لقاء كارثي

نغم…..و ضاقت بيكي الدنيا يا مريم تحطي عينك علي جوز بنت اختك انغام يا مريم اللي روحها كانت فيكي اللي اما عرفت مني ان الشقه بتاعتنا اللي اتاخدت مننا انتي اللي كنتي وخدها و بسعر ارخص من التراب قالتلي مش مهم دي مريم
مصعبتش عليكي قدرتي ازاي تعملي فيها كده متخيله ان كل اللي حكتيه ده هيخليكي تصعبي عليا انتي عايزه توصلي لايه بالظبط يا مريم انك تقولي انك ندمانه برضوا مش هصدقك ولا هسامحك

مريم….بتنهيده انا لا عيزاكي تصدقي ولا تسامحي حقك ماهو برضوا اللي انا عملتوا مش شويه

بصلها عشري بصدمه و ابتسم

مريم…..انا اه ندمانه غلطت و معترفه بغلطي يمكن انا مشيت وراء هاني و الشيطان لعب معايا لعبته بس وقتها انا كنت نفسيا تعبانه

نغم….بضحكه سخريه بجد و هو اي حد نفسيته تتعب يبص علي اللي في ايد غيره يقرب من علاقه حرام انغام كانت علي ذمته و دي بنت اختك يعني مينفعش

مريم….حصل بس قولتلك غلطت ويمكن دي الحاجه الوحيده اللي ندمت عليها هي وحبستي ليكي انما الجبروت اللي انا فيه علي الناس لا مش غلطانه عشان هما يستاهلوا بس ربنا عالم اني عمري ما جيت علي ضعيف وبرضوا دي انتي عرفاها كويس انا مبجيش غير علي القوي الوحش او اللي بيقرب مني مصلحه غير كده لا

نغم…..هو انتي فاهمه انتي بتقولي ندمانه في ايه فاهمه اصلا انك تبقي علي علاقه بجوز بنت اختك ولا بجد انتي مش فاهمه

مريم….لا فاهمه يا نغم بس زي ما قولت نفسيا كنت تعبانه اوي ماهو لما واحده تتعب و تتفاجئ انها عندها سرطان في الرحم و تضطر تشيل الرحم و تتحرم من انها تبقي ام و تفتكر انها هتسيب كل الملايين دي لناس متسواش بتتجنن و وقتها مبتبقاش واعيه لروحها

بصولها كلهم و بصتلها نغم بصدمه

نغم…..سرطان ؟ انتي كدابه يا مريم لا لا مش هصدقك امته وازاي

مريم…..بابتسامه ايه فكراني بستعطفك انا قولتلك لا عايزه منك تصدقيني ولا عيزاكي حتي تسامحيني بس انا مش بكدب انا جالي سرطان و شيلتوا لما قولت اني هسافر بره مصر وقتها شيلت الرحم و اكيد اتحرمت من اني ابقي ام و هاني الوحيد اللي كان عارف كنت وقتها بتعامل معاه علي انه جوز انغام وبس و لان العمليه مكانتش سهله اضطريت اقولوا و محبتش اقول لحد تاني انتي عارفه كويس اني اكتر حاجه بكرهها في حياتي اني ابان ضعيفه و مكنتش هقدر اشوف في عين اي حد الشماته ولا حتي نظره شفقه بس مش هكدب الموضوع ده دمرني و هاني استغل كل ده مش برر غلطي في اني اتجريت وراه بس وقتها حسيت بضعف و قلة ثقه وقلة حيله حسيت ان الفلوس و الملايين ملهاش قيمه
كنت عايزه بس احس اني ست ممكن حد يضحي عشانها حتي لو مش بتخلف و هاني دخلي من الحته دي و انا شيطاني خلاني روحت وراه