لقاء كارثي

نغم……بجد كنتي هتمنعيها يعني انتي مفرحتيش في مو/تها عشان الطريق يبقي فاضي ليكي مع هاني كفايه كدب بقي كفايه انا مش مصدقاكي و مش مصدقه الجدعنه اللي حصلت من شويه دي تقفي في وشه عشاني تضربيه قدام الناس و ترمي عليه يمين طلاق ايه يا مريم فكراني هبله فكراني هصدق ان الكلمتين اللي قولتيهم دول حب فيا قولتلك لو عشان التنازل كده كده هتنازل عشان ابعد عن وشك و وشه

مريم…..اسمعيني يا نغم انا ست عاشت عمرها كله في السوق بين التجار و العمال و الصانيعيه يعني افهمها و هي طايره و انتي عارفه كويس ان قضيتك دي لو قعدت بدل اليوم سنه في المحاكم كنت هكسبها و مكنتيش هتقدري تثبتي عليا حاجه بالوسايط بقي بالفلوس بلعب وسخ من تحت التربيزه مكانتش هتفرق بس انتي عارفه كويس اني كنت هكسب و عشان كده اختارتي متطلعيش خسرانه وانا محبتش اطلعك خسرانه و نفذت شروطك في التنازل مع اني كنت واثقه اني لو كملت مكنتيش هتطولي حاجه

نغم…..ايه جدعنه منك يعني

مريم…..مش جدعنه بس ده الحب اللي انتي بتحاولي متصدقيهوش بمزاجك او غصب عنك يا نغم انتي عارفه اني بحبك انتي واختك

عشري…..بصلهم كلهم هو ايه الدنيا بالظبط انتي معاها ولا عليها طيبه ولا شريره ولا ايه حكايتك

نغم…..متصدقهاش هي بتكدب دي طريقتها بتعرف تكسب اللي قدامها عشان يتعاطف معاها

مريم…..بابتسامه مش انا يا نغم اللي يبذل مجهود عشان الناس تتعاطف معاه انتي عارفه اني لو حابه اجبر اللي قدامي يصدقني غصب عنه هعمل كده

قرب شاب حطلهم القهوه و مشي

بصتلها نغم بغضب

مريم….انا مش ملاك يا نغم انا بشر و البشر خطاء و انا ليا اخطائى و معترفه بيها بصتلهم و هي بتشاور علي الشارع شايفين كل واحد من اصحاب المحلات والعمال و الصنايعيه و الناس دي كلها مفيش مخلوق فيهم يقدر يتجرأ و يقف قدامي يقولي تلت التلاته كام الكل بيخاف مني و بيعملي الف حساب من جواهم كرهه الدنيا ليا و يتمنوا يشوفوني بم/وت قدامهم انهارده قبل بكره بس ده اللي جواهم اما اللي براهم غير بيظهروا حبهم و احترامهم

عسال….وانتي شايفه ان دي حاجه حلوه؟

مريم…. بابتسامه هاديه بالعكس دي اوحش حاجه في الدنيا ان البني ادم اللي قدامك يظهرلك عكس اللي جواه بس الاسوء انك تبقي شايف اللي جواه و سامع كمان الكلام اللي بيقولوا في سره و هو واقف مبتسم في عينك