لقاء كارثي

الدكتور….جميل طيب وليله ؟

نعيمه…. بابتسامه بصت لبعيد ليله بقي كان حضني ليها مختلف يمكن انا عيطت مع البنات اوي بس لما حضنت ليله انهارت كانت وحشاني اوي و يمكن حسيت بوجع غريب من ناحيتها حسيت اني مكانش ينفع اعمل معاها كده

الدكتور…..شعور بالذنب يعني؟

نعيمه….اه زعلت من نفسي اول ما شوفتها بس كانت وحشاني بجد ليله في النهايه اقرب شخص ليا كلهم قريبين بس دي اللي عيشت معاها فتره في بيت واحد فا هي مني اوي وبعدين لما سافرت كانت هي لسه في شهر العسل مشوفتهاش فا بجد كانت وحشاني بس بعد كده قعدنا ضحكنا كلنا اتكلمنا كتير عني و عن فضل و عن نفسنا زي ما كنا بنقعد ديماً حكولي عن كل اللي حصل في غيابي بالتفصيل و انا حكيتاهم اللي حصل معايا هناك وبس لحد ما الشباب جم بليل

الدكتور ….فضل كان معاهم؟

نعيمه…لا مكانش معاهم

الدكتور…زعلتي انه مش معاهم

نعيمه…..يمكن كان نفسي اشوفه بس كنت متوقعه انه مش هيجي و في نفس الوقت كنت مرعوبه انه بجي مشاعري كانت متلغبطه اوي بيني اني عيزاه يكون معاهم وبين اني مبسوطه انه مجاش

الدكتور….طيب كلميني عن استقبال الشباب ليكي كان شكلوا ايه و فرق معاكي ولا لا

نعيمه…. بابتسامه يااااااه ده فرق معايا فوق ما تتخيل اولا استقبالهم ليا كان غير متوقع يمكن كنت عارفه انهم هيسلموا هيبقوا ذوق معايا كالعاده لكن اني احس اني بجد وحشتهم كده لا متوقعتش و يمكن اللي خلاني مكنتش متوقعه لاني كان عندي شعور قوي انهم زعلانين عشان فضل و ده طبيعي بس بجد كانوا يجننوا اتكلمنا هزرنا ضحكنا حسيت كاني لسه سيباهم امبارح كلموني عن فضل و سالوا عني و نصحوني ازاي اتكلم مع فضل واقول ايه بجد اخواتي

الدكتور ….طيب وعشري

نعيمه……بأبتسامه كان واحشني اوي بجد يمكن هو اكتر واحد كلمته فيهم وانا مسافره بس كنت مفتقداه اوي و هو استقباله ليا كان حلو اوي

الدكتور….شعورك تجاهه كان ايه

نعيمه….بضحكه هاديه اهو شعوري ده بقي اللي بيخليني اضايق من نفسي اوي لما افتكر كنت بفكر ازاي الغريب ان حتي قبل سفري مكنتش بشوف نفسي في الحته دي مع عشري بس كنت مسلمه لعقلي اكتر

لما شوفتوا والله العظيم محستش باي حاجه الا ان اخويا كان واحشني حضني ليه و للشباب و سلامي ليهم كلهم كان نفس سلامي لنادر اخويا بجد انا كل ما بفتكر اللي كنت بفكر فيه بضايق من نفسي اوي