لقاء كارثي

الدكتور….تضايقيهم ازاي يعني تتخانقي معاهم

نعيمه…..يعني اتخانق ارخم عليهم كده

الدكتور…..عمرك اذيتي حد بسبب انه اتريق علي اسمك يعني حسيتي ان الموضوع كبر معاكي لدرجه انك ممكن تأذي حد من صحابك او تعنفي حد

نعيمه…..لا خالص موصلتش معايا للدرجه دي بس كنت بضايق بجد اخري اتخانق ادور علي اي حاجه فيهم اتريق عليها يعني واحده بواحده في منهم اللي كانوا يبطلوا يتريقوا عشان متريقش و نبقي صحاب و منهم اللي مكانس بيفرق معاه و عمرنا ما كنا صحاب وبس

الدكتور…..طيب وفي ثانوي وجامعه

نعيمه…. بابتسامه هاديه يمكن الموضوع كان اخف يعني كبرنا اكتر جايز عقلنا كان التنمر بيبقي علي هيئه هزار زي حاجه نعيمه و ست نعيمه كده يعني بس كنا صحاب

الدكتور…..بس هزارهم كان بيضايقك

نعيمه….كنت بضحك و بهزر و ببتسم بس اه اوقات كتير كان بيضايقني حتي لو عارفه انه مجرد هزار جايز في كتير اساميهم اكبر و اتقل من اسمي بس انا محبتش اسمي خالص و من وانا صغيره بضايق منه وبكرهه لانه كان بيخسرني ناس كنت نفسي ابقي صاحبتهم كنت بحبهم من بعيد يعني احب بنت لشكلها لطريقتها احس اننا هنبقي صحاب بس بمجرد ما اقرب منها و تتريق بقفل منها خالص طول عمري بيتقالي اسمك مش لايق علي شكلك

في الجامعه كانوا بيستغربوا الاسم و بيفكروا اني بقول اي حاجه كان في ولاد مثلا حابه تقرب مني تتعرف عليا ولما كنت بصدهم كانوا بيرخموا عليا بتريقتهم علي اسمي بس ده في الاول يعني اول سنه بعد كده بقينا صحاب و برضوا كان بيحصل هزار علي اسمي كنت بضايق بيني وبين نفسي بس بكبر دماغي اوقات كتير

كنت بخاف ادخل في اي علاقه مش بس حب حتي لو صحاب عشان بخاف اتسأل عن اسمي طول عمري اللي بيسالني اسمك ايه بقولوا نوني ده اسم الدلع بتاعي بس كانوا يسالوا طيب اسمك الحقيقي كنت اخاف الحقيقه اللي عمري ما خفت منهم هما صحابي البنات احنا شله خمس بنات وانا السادسه بتاعتهم و جايز لما بيحبوا يرخموا عليا ينادوني باسمي بس الحقيقه ان هما بالذات اللي عمري ما زعلت منهم سواء بهزار بتريقه بتنمر مبيفرقش معايا بالعكس لما واحده فيهم تقولي يا نعيمه ببقي عارفه انها مضايقه من حاجه بمعني اصح بفهمهم من طريقه نطقهم لاسمي قالوا نوني اعرف انهم كويسين قالوا نعيمه اعرف ان فيهم حاجه