لقاء كارثي

الدكتور …ودي اهم نقطه انك جايه بمزاجك تبدأي منين و تقولي ايه مش مهم المهم انك ترتاحي و تكوني صريحه مع نفسك مش معايا في ناس بتيجي هنا يا نعيمه و هي حابه تيجي بس لما بيبدأوا يتكلموا بيلاقوا نفسهم بيخبوا حتي الحقيقه اللي كانوا جايبن عشان يقولوها مبيعرفوش و دي مشكله بتحصل معانا كلنا يمكن في حياتنا ناس مهمين و بنحبهم و بنثق فيهم بس اوقات بيحصل حاجه تخلينا مش قادرين نتكلم معاهم او نقولهم اللي جوانا وانا هنا معاكي لا انا اعرفك ولا تعرفيني فا عايزك تتكلمي براحتك من غير ما تخبي حاجه انتي اكيد عارف ان اللي بيحصل هنا هو سر بينا بيتنسي بمجرد ما تمشي
فا خدي راحتك و قولي كل اللي جواكي متقلقيش

نعيمه…..بس انا مش عارفه اتكلم يمكن عايزه بس حاسه اني مش عارفه اقول ايه مش عارفه ارتب الكلام مش عارفه اخرجوا مني مش عارفه اوصلوا

الدكتور…..مش مهم خالص انك ترتبي الكلام ولا انك تجمليه قولي اللي جواكي حتي لو بشكل عشوائي و لو مش حابه انهارده تتكلمي في الحاجه اللي جابتك اصلا هنا خلينا نبدأها مع بعض بهدوء عشان نفك التوتر ترتاحي اكتر تطمني خلينا مثلا نبدأ باسمك بالمناسبه اسمك حلو بس هو علي اسم حد في عيلتك صح

نعيمه….بابتسامه اه جدتي ام بابا

الدكتور…..جميل طيب قوليلي يا نعيمه بتحبي اسمك ولا زي اي طفل اتسمي علي اسم جدته و حس ان الاسم كبير وتقيل عليه و بيضايق منه

نعيمه….بابتسامه بصت لبعيد يمكن لحد وقت بسيط اوي بدأت اتقبلوا طول عمري مش بحبه خالص و كان عاملي مشكله كبيره في المدرسه وانا صغيره صحابي كانوا بيتريقوا عليه كانوا بيفضلوا يقولوا اسمك قديم اسمك وحش اسمك كبير

كنت برجع اعيط اماما واقولها انا عايزه اغير اسمي انا مش بحبه كنت بخاف اقول كده لبابا لاني بحبه اوي ومكنتش بحب ازعلوا مني لانه كان بيحب تيته الله يرحمها اوي

بس هو كان عارف اني مش بحبه كان بيفضل قولي اسمك جميل و مميز و مختلف وجدتك كانت ست جميله المفروض تفتخري باسمك و متزعليش كنت بحاول اتقبلوا بس قدامه واحسسه اني اقتنعت بكلامه
بس لما كنت ارجع مع صحابي والمدرسه اضايق من تريقتهم و ضحكهم علي اسمي و لما دخلت اعدادي بدأت اواجه نفس المشكله

كان معايا صحابي من ابتدائي و صحاب جداد اتعرفت عليهم كانوا بيعيدوا نفس التريقه بس وقتها كنت كبرت شويه كنت بعرف ارد بعرف اضايقهم زي ما بيضايقوني