لقاء كارثي

فا قررت اني خلاص انا هوقف كل ده في النهايه انتوا بتزعلوا و بترجعوا تتصالحوا بس انا نفسيا مش حابه اشوف امي وابويا كده طول الوقت فا بعدت و استقريت لوحدي

الدكتور…..طيب والقرار ده كان مفاجئ ليهم ولا اتكلمتي فيه معاهم قبل ما تاخديه و هل حصل اعتراض

نعيمه…..لا طبعاً مكانش مفاجئ انا بالشجاعه دي او مقدرش علي زعلهم

في البدايه بحكم شغلي اتحججت انه بعيد و هفضل مع ليله شويه مكنتش قايله في الاول ان انا وليله هناخد البيت مع بعض و بس شويه شويه قزلت اني هستقر معاها و في الاجازات هجيلهم اقضي الوقت معاهم في الاول ماما رفضت وقالت معنديش بنات تقعد لوحدها و بابا حاول يقولي لا و مينفعش بس شويه شويه اقنعتهم و بس الموضوع بقي امر واقع او يمكن هما اتعودوا

الدكتور…..المشاكل دي حاسه انها مسببالك عقده او مخوفاكي من المستقبل خايفه مثلا حياتك تبقي نسخه مصغره من اهلك

نعيمه…..يمكن لو كنت فضلت كانت عملت فيا كده بس لا مش لدرجه عقده جايز مشاكل عبيطه وانا اللي كبرت الموضوع بس انا وقتها كنت مضغوطه وحاسه اني مش عايزه اعرف او اسمع اكتر من اللي عرفتوا وسمعتوا

الدكتور…..بس هي مش مشاكل بسيطه بالعكس دي مشكله اغلب البيوت هي تبان مشكله تافهه بس احنا بني ادمين و بنتأثر و مش عيب انك تقولي انها ماثره عليكي انا اول حاجه بنصح بيها اي حد بيجيلي و عنده مشكله انه يبعد عن اي مشاكل او اي طاقه سلبيه حتي الاخبار او المشاكل اللي بنحصل علي السوشيال ميديا بطلب منهم ميتفرجوش عليها يمكن هما ناس لا تعرفيهم ولا يعرفوكي و مجرد اخبار منتشره بس عادي ممكن تاثر عليكي فا انك تبقي في بيت في مشاكل و مع ناس قريبين منك اكيد هتتأثري بشكل او باخر

نعيمه …اكيد بس اقصد ان مشاكلهم مسببتليش عقده يعني انا ارتبطت و اتخطبت مره فا لو في عقده مش هعمل ده اه سيبته بس لاسباب بعيده عن خلافات اهلي بس انا خاليا مخطوبه تاني و عادي

الدكتور ….طيب سيبتي ليه خطيبك الاول

نعيمه…..لان طباعه هو و والدته مكانتش تتناسب مع طباعي

الدكتور…..بمعني؟

نعيمه….بمعني اني في البدايه اتخدعت فيه بس لما حصلت الخطوبه و فضلت معاه سبع شهور اكتشفت انه مش الراجل اللي اقدر اكمل معاه بيسمع كلام والدته في كل كبيره وصغيره لما كنا بننزل عشان نجهز بيتنا كان بدل ما يسالني انا يتصل بيها ويسألها و يصورلها ولو انا اختارت حاجه لازم يرجعلها و يقولها نعيمه اختارت ده ايه رايك اوافق هنا حسيت انه لا مش هقدر انت المفروض راجل مش طفل و كمان انا اللي من حقي اختار كل حاجه في بيتي مش هي مينفعش ابقي معاك و بتشتري طقم ليك و تتصل بيها تقولها ماما ايه رايك خوفت مش انا و بعدين انا يمكن شخصيتي قويه شويه و انا اللي بمشي حياتي و الطبيعي ان الست لو قويه بتحتاج راجل اقوي منها مش راجل بيسأل مامته عن كل حاجه عشان كده مقدرتش