لقاء كارثي

ضحكت و اتأثرت وهي عماله تفتكر معاه و عيونها لمعت ودمعت بصتلوا بهدوء

عدي…..بابتسامه يومها يا تقي لفتي نظري اوي و حسيت اني بركز معاكي من غير ما احس بعدها قعدنا فتره مشوفكيش و لا عارف عنك اي حاجه و بصراحه كنت عادي مكانش في اي مشاعر غير انك لفتي نظري لحد ما حصلت المشكله بين ليله وعشري بردوا مشوفتكيش وقتها خالص و بعدها عشري قرر انه يتجوز ليله و ياخدها يوم فرح امنيه اخت ايمي مكنتش اعرف انك متعرفيش و بردوا كل ده مكنتش شوفتك لحد ما عرفتي و روحت انا البيت عند ليله عشان اخد حاجتها في نفس اليوم اللي انتي عرفتي فيه شوفتك وانتي متعصبه و داخله طايحه في الكل يومها لو تفتكري انا فضلت واقف ساكت براقبك وبراقب انفعالاتك و عصبيتك فكرتيني بيوم فرح ايمي لما اتعصبتي عليا قولت جوايا ايه المجنونه دي اللي علي طول داخله شمال في اي حد

ابتسمت بهدوء

عدي…..بس بصراحه صعبتي عليا خصوصا لما عرفت انك لسه عارفه محاولتش اتدخل ولا اتكلم عشان متفهميش اني بدافع عن اخويا و بهاجمكم بس انتي فجأه بصتيلي و قولتيلي وصلني لليله خدتك معايا و طول الطريق مكنتش عارف اخلص من لسانك الطويل و كملتي كمان في البيت عندهم و اتعصبتي و انا اتعصبت بس كان في حاجه جويا بتركز معاكي اوي لحد ما خدتك و وصلتك يومها حصل جوايا حاجه غريبه عارفه السلك لما يلمس و في نور بسيط كده ينور جواكي ده اللي حصل فيا كنت مبسوط اوي و احنا بنوصلك و قاعد انا وانتي نتكلم و نناقر في بعض و طلبتي مني وقتها اطلعك عشان وليد ميتخانقش معاكي لما نزلنا عند البيت وقتها امي اتصلت عليا و انتي فهمتي انها حبيبتي و انا مش عارف ليه حبيت اسرح بيكي بس كنت عايز اعرف هيفرق معاكي و لا لا كنت عايز افهم الاول ايه اللي حصل جوايا ده حقيقي ولا مجرد استغراب لشخصيتك ولما طلعنا طلبتي مني اتدخل لو حصل اي حاجه من وليد و ساعتها مش هكدب عليكي حبيت استغل الموقف و اطلب مقابل مش عارف ليه عملت كده بس كنت حاسس اني عايز اشوفك تاني عايز اخلق مساحه بينا تخليني اتكلم معاكي اشوفك اعرفك و حصل قابلتك تاني و تالت ورابع و كل مره كنت بشوفك فيها و يحصل بينا اي موقف كنت بقرب منك اكتر و لما تمشي ببقي مستني اشوفك تاني

يوم ما حصل الموقف بتاع الصحاب دول كنت خايف عليكي اوي و مكانش خوف عادي انا كنت خايف بجد و هنا حسيت انه لا اللي جوايا ده كبير و اخر خروجه خرحتها معاكي فضلتي فتره بعدها مترديش عليا لما اتكلمنا مع بعض و سألتيني في حد في حياتك قولتلك اه كنت حابب اشوف رد فعلك و اتأكدت ان مشاعري من ناحيتك زي مشاعرك من ناحيتي و لما امي اتصلت و كنتي هتقومي مسكت ايدك و قعدتك و حسيت بغيرتك