لقاء كارثي

سلمي….مش حكايه حسان والله هو مش هيرفض خصوصا لو معاكي انتي وعشري بس انتي مش فاضيه يا ليله

ليله…..يعني انتي اللي فاضيه علي الاقل انتي عندك شغلك ولازم تركزي و عادي يعني نشيل بعض مفيهاش حاجه

ارمي….بضحك نوني تاخدها

نعيمه….اه ما ده اللي ناقص

سلمي…..بت اسكتي انا مجتش جنلك ولا طلبت منك حاجه

نعيمه…..انا نفسي اعرف ليه مستغربين كلامي اي واحده فيكم تحتاج مني حاجه رقبتي وانتوا عارفين بس بصراحه انا متعصبه منك اوي يعني كنتي غيرانه منها الوقت واخده بنتها

ليله….لا حول ولا قوة الا بالله انتي عايزه ميت شبشب من ايمي يابت متسخنيهاش ايه المشكله يعني و تغير ليه اصلا هي سلمي ناقصه ايد ولا رجل كان عندها شويه افكار مهببه و راحوا لحالهم خلاص

نعيمه…..انا قولت اللي عندي هي حره بقي علي الله متجيش تعيط في الاخر اصل انا عارفه شغل النسوان الحربايه مش بعيد تكون قاصده تديها لحسان عشان تنكد عليكي ما اصل حسان هيعمل ايه يعني للبت ما تخليها معاها

ايمي…..بضحك احييييه علي نعيمه دي عدت البوتجاز يا بت ليه سوء الظن بتقولك هي اللي كلمتها و طلبت منها

سلمي…..بضحك فظيعه بجد يا نوني والله والله ما طلبت ولا حتي حسان طلب هو مكانش راضي وهي بصراحه مكانتش راضيه و طلبت من حسان كده لانها مش هينفع تاخدها معاها دي طفله هتروح تشوف مامتها بتولد ولا بتعيط و تترعب

ليله…..ريحوا دماغكم نعيمه عايشه في عالم لوحدها و مهما تقنعوها خلاص قفلت دماغها انتي فاكره ان سلمي عيله صغيره برياله و متقدرش تفرق بين واحده حربايه بجد و واحده محترمه هي الست دي بجد لو وحشه هتوافق تديها بنتها او هتدي الفرصه لسلمي يبقي ليها جميل عندها فوقي بقي و بلاش نظريه المؤامره دي اللي انتي عايشه فيها مش كل الناس وحشه

نعيمه…..اعيش في نظريه المؤامره احسن يا اختي ما اعمل زيك و افتح صدري و اعمل فيها جدعه و شايله هم الكل و واخده دور البطوله في الجدعنه خديها يلا و شيلي همها انتي كمان

بصت ايمي لسلمي و الاتنين اتصدموا و بصوا لليله حسوا انها اضايقت بصت ليله لنعيمه و ابتسمت بهدوء.

ايمي….هو انتي يا بت علي طول كده زي الدبش هي قالت ايه غلط عايزه تشيل مع صحبتها عشان عارفه انها عندها شغل

نعيمه……واحده رايحه هي وجوزها يشتروا حجات لجوازها تاخد معاها عيله صغيره مش وقت جدعنه خالص علي فكره لو هتستجدع مع سلمي ماشي في النهايه سلمي تخصنا انما مش تستجدع مع بنت طليقه خطيب صاحبتها