لقاء كارثي

ايمي….ماهي دي بنت حسان يخصنا بردوا

نعيمه….علي عيني وعلي راسي بس بردوا المشكله مش في حسان المشكله في بنت طليقته بس خلاص ليله هتشيل علي الله بس متندمش لما متعرفش تجيب حاجه منها

سلمي…..بابتسامه نعيمه هو انا طلبت منك تاخديها انتي ليه متعصبه كده

نعيمه….انا مش متعصبه بس شايله همك انا لو في موقفك يا سلمي مش هقدر بصراحه مش حباكي تشيلي ليله مش بتاعتك و يا ستي اطلبي انا مقولتش لا بس اني اساعدك تشيلي حاجه مش بتاعتك لا مقبلهاش علي كرامتك

ايمي…..كرامه ايييييييه هي راحه تمسحلها و تنضفلها البيت

سلمي…..نعيمه يا حبيبتي افهمي قولتلك انا اللي طلبت لما عرفت انها تعبانه و لما عرفت ان مفيش حل غير ان هنا تفضل مع حسان انتي لو حاطه نفسك مكاني انا واثقه ان موقفك هيبقي نفس موقفي تخيلي كده فضل مكان حسان والبيت متكسر ومليان عمال والجو برد و ريحة الدهان ماليه البيت و الاوضه اللي قاعد فيها بادوب سرير صغير و علي بعضها وهو شايل الهم مش هتعرضي عليه حتي لو من باب العزومه

نعيمه…..انا مش مكانك ولا فضل مكان حسان جايز اعمل ده بس انا بتكلم علي اللي شيفاه الوقت انتوا بتتكلموا وحسستوني فجأه اني مفيش في قلبي رحمه شاورت علي ايمي واحده محتاجه اللي يساعدها بتقول خلوها معايا و انتي راحه عيادتك وسط المرضي وهتاخديها واختك في شغلها و بتقولك هاتيها و ست الجدعه عندها هم محتاجه تخلصوا و بتقولك اخدها و انا شايفه ان الاسهل من كل ده تقعد مع خالتها هي مش عندها عيال

سلمي…..خالتها بتسيب ولادها وبتروح تشوف اختها و بترجع لان ولادها صغيرين و حماتها مريضه قلب اكيد مش هيسيبوا كل العيال معاها

نعيمه…..يا سلمي دي واحده والده يعني مش ميته و الله مش بعيد تكون بتستموت عشان تضايقك انتي يا بت مش قولتي لما شوفتيها ان نظراتها ليكي كانت غريبه

سلمي…..قولت بس ده كان حكم مسبق و غلطت لان طبيعي هي اول مره تشوفني تركز معايا و انا اول مره اشوفها هركز معاها و اكيد كان في حزازيه في البدايه من ناحيتنا احنا الاتنين انا بس وقتها مش هنكر اني كنت غيرانه ومضايقه لان الموقف جديد عليا بس لما فكرت بالعقل لا انا غلط لان سبب انفصالهم من البدايه كان البرود و مفيش حب و الاتنين عايزين ينفصلوا كان لازم افهم اني بفكر غلط وبعدين هي مش بتستموت ولا حاجه بلاش تسيئي الظن متعرفيش هي فيها ايه