لقاء كارثي

لقاء كارثي
أميره أسامه
صاحبة البطل الواحد

. البارت المئه 160.

………………………….

مش كل فرق يبقي عيب.
في فروق بتخوفنا في البدايه لكن مع الوقت بنكتشف إنها كانت أهون بكتير من خوفنا منها.

هي كانت شايفه إن العمر رقم واقف بينهم حاجز يمنعها تقرب
وخايفه من كلام الناس أكتر ما كانت سامعه صوت قلبها و خايفه من الفشل و الحياه و الحواجز اللي ممكن تقف بينهم

لكنها مع الوقت اكتشفت إن النضج عمره ما كان بعدد السنين
وإن الرجوله احتواء وإن الأمان مش بيتقاس بتاريخ الميلاد.

اكتشفت إن الشخص اللي كانت خايفه من فرق العمر بينه وبينها
كان أكبر منها في العقل وفي الاحتواء وفي الطيبه وفي قدرته إنه يحتوي خوفها قبل فرحها.

وساعتها فهمت إن بعض الناس
وجودهم في حياتنا أكبر بكتير من أي رقم مكتوب في البطاقه.

نسيت فرق السن اللي كان شاغل بالها طول الوقت دخل حرب مع قلبها وكسبها بهدوء من غير ضغط ولا محاولات مبالغ فيها كسبها بالأمان اللي كانت بتحسه وهي معاه
وبالنظره اللي كانت بتقولها إنه قد المسؤوليه وقد التحدي وقد أي حرب ممكن تواجههم.

ومع الوقت حضوره وهيبته وطريقته في الاحتواء كانوا كفيلين يخلوا أي رقم يفقد معناه قدام علاقتهم.

الحب ميعرفش كبير و صغير
لأن في النهايه القلوب لما تختار بصدق الأرقام مبتبقاش أهم حاجه.

…………..
20/4/2026 الفرحه المنتظره

بعد مشاورات واتفاقات و مين صح و مين غلط و بعد اقتراحات و جدال طول الاسبوع علي نقطه سفرهم تكون منين..

اختلفوا كتير قرروا في الاول يتقابلوا كلهم في مكان واحد و يمشوا راء بعض و بعدين قرروا كل واحد يروح مع نفسه وبعدين قرروا يتقابلوا علي اول طريق السخنه

كل واحد فيهم بقي يقول من عندي اقرب لا من هنا اقرب و بعد خلاف دام شويه حلوين

قرروا انهم يتجمعوا كلهم عند زوزو بيت العيله الكبير الي بيجمع كل الحبايب وبما ان مدينتي اقرب لطريق العين السخنه عن مدينه نصر اللي هو مسقط رأس عسال و سلامه

اقنعت ايمي الكل و فعلا طلعت المسافه من عندها اقرب بكتير نص ساعه لو سريع و لو هيمشوا براحتهم هياخدوا ساعه بالكتير

طبعا الكل وافق ورحب و بدأوا يتجمعوا عند زوزو كل اللي يجي يستني لحد ما يتجمعوا كلهم و يمشوا مع بعض..

وصل عشري و ليله و اهل عشري كلهم بلا استثناء حتي محمود العريس