لقاء كارثي

سلمي….ان شاء الله خير لو محتاجين مني اي حاجه انا موجوده يا حسان و اكيد هبقي اروح اشوفها

حسان…..ان شاء الله يا قلبي انا عشر دقايق كده و ماشي هبقي اكلمك ولا هتنامي

سلمي…..لا هستناك تكلمني

حسان….ماشي يا ماما يلا شويه و هتصل عليكي اخرج بس

سلمي…اوك باي يا روحي

حسان….سلام..

……………
طلع عدي علي السرير عشان ينام وااصل الاول بتقي ..

تقي…..الووو

عدي….لسه صاحيه

تقي….اه بذاكر انت روحت

عدي…اه روحت من شويه و قولت اكلمك قبل ما انام

تقي….ده انا قولت مش هتتكلم و واخد موقف

عدي….واخد موقف ليه انا تمام و بكلمك اهو قوليلي بكره رايحه الجامعه ولا هتعملي ايه

تقي….اه هنزل علي الساعه واحده عشان عندي محاضره و في ملازم و شيتات محتجاها

عدي….محاضرتك امته؟

تقي….اربعه

عدي….وليه نازله من واحده

تقي….عشان هروح اجيب الورق الاول و المكاتب بتبقي زحمه جداً يارب بس اعرف اجيب الورق و متأخرش علي المحاضره

عدي….طيب ليه زمايلك ميروحوش هما يجيبوها ادهم او اي حد من الشباب

تقي…..هو المفروض ان انا اللي هجيب الورق ليهم اصلا لان بكره تمارا عندها جلسه كيماوي و ادهم اكيد رايح معاها

عدي….اه فهمت طيب و الاستاذ حدوته

تقي….بابتسامه هاديه حدوته لسه باعت الوقت في الشات بيسأل علي المحفظه بتاعته لو وقعت في عربيه ادهم او لو نسيها مع حد فيها الرخص و البطاقه و كل حاجته و محدش لقاها فا هيروح الصبح يعمل محضر و يحاول يطلع عليهم اكيد مش هيعرف

عدي….اممم طيب تمام يعني هتنزلي واحده

تقي….اه ان شاء الله

عدي….ان شاء الله

تقي…..انت هتنام

عدي…..اه عشان هصحي بدري عندي مشوار مهم

تقي……رايح فين ؟

عدي….وانتي مالك

تقي….بصدمه ابتسمت نعم

عدي….ايه اتصدمتي ليه انتي مالك بتدخلي ليه في مشاويري

تقي…..ما انت من اول ما اتصلت و عمال تسألني و تدخل و تعرف خط سيري تصدق انا غلطانه اني قولتلك

عدي….انتي هبله و قولتي علي طول اعملك ايه

تقي…صح انا هبله بس ولا تزعل نفسك مش هقولك اي حاجه تاني

عدي….طب جربي كده

تقي….هتشوف زي ما بتعمل معايا هعمل معاك اصلا لو مكنتش قولتلك كان زمانك اتقمصت

عدي….بأبتسامه لا مكنتش هتقمص بس كنت هطلع عينك

تقي….ليه ان شاء الله

عدي….هو كده عشان احنا متفقين اعرف يومك بيمشي ازاي