لقاء كارثي

كان معاهم اخواته كلهم بعد ما عرفوا اللي حصل من فضل و ان مريم اتقبض عليها و ابوه كمان كان معاهم وليد راح هو وتقي عدي كان عايز يتكلم معاها باي طريقه بس مش عارف يادوب بس سلم عليها و محاولش يلفت نظر وليد او يوترها ويبان عليها اصلا الوضع مكانش سامح …

اطمنوا علي رهف وعرفوا انها خرجت من العمليات و معاها والدتها و علي و امينه وسليم ونجود و كام واحده من البنات ..

بعد ما خلصوا كل التحقيق سابوا طبعا ليله لان لا مريم اتهمتها بأي حاجه و لا عملت محضر تعدي و لا حتي الشاب اللي كان معاها فا بكده هي مش عليها اي حاجه والظابط راعي حالتها النفسيه اللي وصلت ليها خصوصا بعد ما شاف صوره عمر و الراجل اللي حاطت ايده عليه و سمعتوا التسجيل وهي بتقولها ان الراجل هيتحر,ش بيه فا قدر الموقف و خوفها عليه..

بعد ما خرجوا راحوا معاهم اطمنوا علي رهف في المستشفي كانت تعبانه و عماله تقوم و تنام من تأثير البنج ..

امينه كانت واخده ليله في حضنها منظرها كان صعب والتيشرت كله دم عشري كان حاطت عليها الچاكت بتاعه بس باين طبعا شكلها

وبعد وقت بسيط عشري خدها يروحها لانها مكانتش قادره مشي هو و هي وفضل و نعيمه و تقي و وليد و وصلوهم علي البيت ساب وليد العربيه بتاعتها و تقي فضلت معاهم و مشي هو وقال هيبقي يرجع يطمن عليها ..

طلعوا معاهم علي فوق..
كلهم ساكتين في حالة صدمه و بالاخص فضل و عشري اللي منظر مريم و الراجل مش قادر يفارقهم و لا منظر ليله وصلوها لدرجه الانفجار

ليله….بهدوء انا هدخل اخد شاور.

عشري…..تمام علي مهلك.

دخلت ليله قدامهم و هما فضلوا واقفين باصين عليها.

نعيمه…..بتنهيده اقعد يا عشري اقعد يا فضل

فضل…..ليله مش كويسه خالص نعيمه ما تروحي خليكي معاها احسن انتي او تقي

نعيمه…هروحلها الوقت اقعدوا بس

تقي……نعيمه لو في اي مسكن هنا عشان ليله من بدري تعبانه و مش عايزه حد يعرف

عشري…..تعبانه مالها ؟

تقي…..جريت كتير اوي و احنا بندور علي عمر و بنسأل عليه في الشارع وجنبها كان واجعها يعني مجهود و توتر مكانتش قادره و كل شويه تمسك جنبها

فضل…..طيب هي واكله عشان متتعبش اكتر

نعيمه….هي مكلتش اصلا نزلت علي طول

تقي…..ايوه انا اللي صحيتها من النوم اصلاً و قولتلها و اكيد يعني مش هتقعد تفطر هي نزلت بسرعه