لقاء كارثي

مشي و قفل الباب وراه و هي فضلت واقفه باصه عالباب و بعدين قعدت ورجعت شعرها لوراء و فضلت تهز في رجلها ورجعت بصت للباب تاني وهي هتتجنن من غيرتها وعقلها اللي سوحها تاني علي رحاب بعد ما كانت هاديه خالص من ناحيتها

………………..

في منزل سلامه و أيه..

عسال…في ايه يا مصطفي مالك؟

مصطفي…ااا في حاجه حصلت بس والله العظيم يا ميدو انا ما كنت قاصد خالص

عسال….يعني ايه ؟

سلامه…ما تتكلم يالا في ايه مالك

قربت ريهام منه بصت علي الموبايل و برقت و ابتسمت

حنان…يا ابني في ايه مالك ما تنطق سيبت اعصابي

مصطفي…..انا صفحتي علي التيك توك بقت 850 الف متابع

سلامه….بابتسامه واسعه انت بتتكلم جد ؟

عسال…..ازاي يعني و بعدين انت زعلان ليه مش كنت عايز الصفحه تكبر قبل ما تعمل البرنامج

مصطفي….ايوه بس مش كده يعني ااا ميدو بصراحه انا صورت كذا فيديو ليك انت و نادين من الفرح و نزلتهم عادي بس في فديو منهم ضرب و بقي ترند بتاعكم وانتوا راكبين عالفلاي بورد

نادين…..بصدمه و ابتسامه بتتكلم جد ؟ يعني احنا ترند

عسال…..بابتسامه طيب انت مالك عامل كده ليه

مصطفي….انا مش عايزك تزعل مني ولا تفكر اني كنت قاصد و حياه ربنا مكنتش متخيل ان الموضوع يضرب كده انا لسه حالا فاتح الموبايل لما رجعنا امبارح كان خلاص بيخلص شحن و حطيته عالشاحن قبل ما انام و كان مقفول و صحيت الساعه خمسه جيت هنا و من وقتها مبصتش فيه انا فتحت لاقيت صحابي كله مشيرين الفديو ومكلمني و باعتين رسايل

عسال…بضحك ايوه فين المشكله برضوا

مصطفي….المشكله اني مكنتش قاصد انا كنت فرحان و نزلت فديو عادي وسط فديوهات كتير لينا في الفرح و حتي في فديوهات بسيطه لليوم اللي قبل الفرح مطانش عليهم مشاهدات اوي انا اصلا كان عندي حوالي الفين متابع المشكله ان فديو الفلاي بورد ضرب و باقي الفديوهات بقي عليها نسبه مشاهدات كتير و مش بس كده الفديو ترند في مصر يا ميدو و في صفح واخبار كاتبه عنكم

نادين…..انت بتتكلم جد ؟

ايه… بابتسامه بقيتوا مشاهير خلاص

عسال….استنوا بس انت زعلان ليه هو انت فاكر اني ممكن اضايق

مصطفي….ميدو انا عارف انك ملكش في جو الشهره والاضواء ولو بتسعي ليه كنت سعيت في صوتك وعارف انك رافض المبدأ اصلا فا انا مش عايزك تزعل مني انا عارف ان دي لحظه خاصه و انا مكنتش قاصد اطلع ترند علي حسك والله العظيم انا كنت فرحان و نزلت عادي