لقاء كار.ثي

عدي….. بابتسامه انتي صح و ليله صح و مش هكدب عليكي جايز جوايا جزء بسيط مش موافق او مضايق بس في جزء اكبر جوايا و هو الخوف خايف عليكي و علي مستقبلك مش عايز وليد او اي حد يلومني لو المسؤوليات اثرت عليكي

انا اكيد مكنتش هعمل ده و كنت هساعدك و هدعمك و هوفرلك كل حاجه تخلي بالك رايق و مركزه في مستقبلك بس كمان ده اللي انا حابب اعملوا لكن في احتماليه كبيره ان لما الجواز يحصل غصب عني اقصر او مقدرش اكون قد المسؤوليه دي اللي بره الموضوع بيشوف بعين تانيه غير اللي جوه مش معني كلامي ده اني هرجع في كلامي بس ممكن اقصر باي شكل من الاشكال وانا بني ادم و عشان كده الافضل اننا نستني علي خطوه الجواز عشانك عشان مستقبلك عشان لما نتجوز ميبقاش في مسؤوليات تضغطك و تأثر عليكي نحاول نتلاشي اي مشاكل نفهم بعض اكتر زي ما ليله وعشري قالوا بس لازم تعرفي ان في كل الاحوال انا بحبك و مستعد استني لحد ما تخلصي كل حاجه تخص مستقبلك

تقي…..بابتسامه يعني مش زعلان

عدي…..لا طبعاً اكيد عايزك معايا و نبقي في بيت واحد بس كمان عايزك احسن حد في الدنيا

تقي….بابتسامه اااا انا بحبك اوي يا عدي بجد

عدي…..وانا كمان والله العظيم و اوعدك يا ست البنات السنه دي هتكون احلي سنه في حياتك حتي لو قابلتنا مشاكل هنتخطاها ماشي

تقي….بابتسامه ماشي

عدي…..قوليلي بقي انتي هتطولي فوق استناكي و اوصلك

تقي…..لا طبعا امشي انت انا لسه هطلع اخد شاور و هجهز امشي انت و انا ممكن اروح لليله عند عمتو اميمه و امشي معاها

عدي….طيب خلاص اه روحيلها احسن متمشيش لوحدك

تقي……اتفقنا

………………..

وصلت ليله قدام الكافيه عند مصطفي ركنت العربيه وبصت علي المكان من بره كان شكله يجنن سور حديد قصير لونه اسود و ملفوف عليه زرع و ورود و زرع كتير حوالين المكان من بره باب حديد اسود صغير و الكراسي من الخوص الخشب و تربيزات هاديه وشيك
اسم المكان بالخشب عامل جو دافي يجنن نزلت بهدوء و دخلت علي جوه فتحت باب خشب كله زجاج

وبمجرد ما دخلت الموسيقي الهاديه في المكان لفتت نظرها ريحة المخبوزات و القهوه طاغيه علي المكان الديكور اللي علي شكل كتاب كبير جواه مكتبه كبيره من الكتب و الاضاءه الهاديه كل حاجه كانت تجنن في بنات و شباب و عجبها ان في ناس كبيره كمان اللي قاعد ماسك اللاب توب و اللي ماسك كتاب و قدامه قهوه