لقاء كار.ثي

نور….وكل امتحان ليه وقت يبدأ فيه وحضرتك ملتزمتش بالوقت و احنا مش مجبرين نوافق و نرضي و نسكت علي حقنا الساكت عن الحق شيطان اخرس واحنا بنطالب بحقنا
انا متعبتش طول السنين اللي فاتت و طول الترم بذاكر وبجتهد و اهلي تعبانين معايا عشان حضرتك تيجي تستخف بنص ساعه وتقولي مش هتفرق ..

الدكتور…..لو انت طالب مذاكر و مجتهد مش هتفرق معاك النص ساعه ولا انت بقي فارقه معاك اوي كده عشان تغش فيهم براحتك

نور…..انا مسمحلكش تتهمني بحاجه معملتهاش انا مبغشش و اتهامك ده ممكن ادفعك تمنه كويس

الدكتور….انا اللي هدفعك التمن كويس لما تلاقي نفسك شايل الماده

نور…..متقدرش الماده مش ماده حضرتك و دكتور شريف صاحب الماده عارف كويس اوي اني مجتهد و عارف اني اشطر واحد فيها بشهادة الجميع

الدكتور…..بسيطه يبقي اتطمن الماده بتاعتي هتشيلها

نور……وده اعتراف منك قدام الكل اللي هيشهدوا معايا بتهديدك ليا

بدأت الاصوات تعلي و بدأ الدكتور يحاول يقرب من نور و عايز يسحبه علي بره وسط تدخل الامن و الطلاب في انهم يبعدوا الدكتور عنه و كان نور واقف ملتزم و محترم و بيتكلم بس في حقه اصواتهم العاليه خلت باقي مراقبين اللجان يخرجوا علي صوتهم الموضوع كبر و وصل للعميد و بقي مسمع في الجامعه كلها

طبعاً بقي في بنات عماله تعيط من ضمنهم نسمه اتوتروا شايفين ان الوقت عمال يضيع و شايفين ان نور معاه حق و الدكتور مستفز جداً

و طبعاً اغلب الدكاتره حتي العميد كان موقفهم محترم مع نور لانه شاب محترم جدا و معروف عنه انه اشطر الطلاب في الجامعه و كمان هادي جداً وفي حاله ودي اول مشكله تحصل و يكون طرف فيها

بس طبعاً الوقت كان بيمر من الساعه 12 لحد واحده الا ربع و المشكله عماله بتكبر و الدكتور عاند عشان مش عايز كلام نور يمشي و شكلوا يبقي وحش و مصمم يعملوا محضر و بعد وقت طويل بقي فاضل علي معاد الامتحان ساعه وربع بس و طبعاً في امتحان بعدهم يعني صعب يدوهم وقت اضافي بس عميد الجامعه قال كلمته و طلب من نور و زمايله يرجعوا بسرعه علي لجنتهم و يبداوا امتحانهم و حتي لو ملحقوش اكيد هياخد ده بعين الاعتبار..

رجعوا علي لجنتهم و الورق اتوزع اخيراً الدكتور كان واقف مركز علي نور و مخلي اللجنه مشدوده ادرجه توتر هي مكانتش محتاجه غش اغلب الطلبه بتحب الماده دي بس طبيعي التوتر و الضغط يخليهم ميبقوش عارفين يركزوا و هو مكانش ساكت رايح جاي يرمي كلام و يستفز نور