لقاء كار.ثي

علي عكس كل اللجان كانت هاديه والامتحان بدأ فيها في معاده..

دخل الدكتور اللجنه..

الدكتور…..صباح الخير اللي واقفين دول يقعدوا مكانهم و اتمني تبقي لجنه ظريفه و خفيفه علي الكل بيتهيألي اغلبكم عارفني لا بسمح بوجود صوت ولا حركه نخلص كده امتحاننا علي خير عشان اليوم يبقي حلو مكانكم يلا عشان الورق يتوزع.

الشاب اللي كان متعصب اسمه نور الدين كان لسه واقف و في مراقب جنبه عارفه بيحاول يهديه ويخليه يقعد بس هو كان مضايق عشان حقه في الوقت اللي راح هو و زمايله.

نور…..بعد اذنك يا دكتور الساعه كام في أيد حضرتك

الدكتور…..بطريقه رخمه مش وقت سؤال عن الوقت ابقي البس ساعه و اقعد عشان تاخد ورقتك من المراقب

نور….والله انا مش بسأل حضرتك عشان مش معايا ساعه انا بسأل حضرتك عشان واضح ان ساعتك مش مظبوطه

بصلوا المراقب بعدم فهم و بطريقه فيها استحقار

الدكتور….ساعة ايه اللي مش مظبوطه ؟

نور….ساعة حضرتك الساعه الوقت 12 و المفروض الامتحان 11 ونص و حضرتك متأخر نص ساعه بحالها
والنص ساعة دي ضاعت من وقتنا

تقدر تقولي هنعوض النص ساعه دي ازاي و حضرتك اكيد عارف ان الماده طويله ومحتاجه وقت

الدكتور….اقعد يا ابني بلاش كلام فارغ انت بتحاسبني وبعدين النص ساعه دي فرقت معاك اوي ما انت لو مذاكر يا اخويا مش هيفرق معاك وقت

نور…..انا الاول علي دفعتي طول الثلاث سنين اللي فاتو و اظن حضرتك اكيد عارف كويس اني بنجح بمجهودي و النص ساعه دي اه تفرق معايا لان الماده طويله

الدكتور…بصوت عالي وساخر
وانت جاي تتباهى عليا يعني؟ أول دفعتك ولا آخرها دي مش مشكلتي الامتحان هو الامتحان واللي يلحق يكتب يكتب

نور….أنا مش بتباهى يا دكتور، أنا بوضح لحضرتك إن كلامك عن إن الوقت مش فارق غير صحيح
واللي حصل ده مش تقصير مننا كطلبة، ده تقصير إداري واضح

الدكتور…بحده إداري إيه ؟ هو انت فاكر نفسك في تحقيق؟ اقعد مكانك بدل ما أطلعك بره اللجنة

نور…..من حق حضرتك تعمل اللي تشوفه مناسب بس من حقي برضه أطالب بوقتي القانوني في الامتحان
خصوصاً إن الخطأ مش من أي طالب هنا

الدكتور….باستهزاء وقت قانوني!
هو انت محامي ولا طالب؟ ما تكبرش الموضوع عالفاضي واقعد بدل ما تندم

نور….حضرتك مش من حقك تهددني طول ما الحق معايا أنا طالب وعشان كده متمسك بحقي وحضرتك دكتور، والمفروض تكون أول واحد يحترم الوقت والطلبة اللي مستنية من بدري