لقاء كار.ثي

الدكتور…..يلا وروني بقي شطارتكم و ريني انت كمان يا محامي الدفعه هتطلع ازاي الاول.

غمض نور عينه و بقي يهز رجله بغضب و مكانش قادر يركز

الوقت عمال يجري و الكل ساكت و بيحاول يركز نسمه كانت قاعده تعيط و دموعها بتجري و بتكتب بسرعه بخط وحش و بأيد بتترعش و بتحاول تكتب اي حاجه تنجحها وبس كان نفسها تجيب تقدير كويس في الماده دي لانها اكتر ماده كانت واثقه فيها بس انتهي بيها المطاف انها تدور علي حاجه تنجحها و حالها كان نفس حال باقي الطلبه اللي معاها حتي نور المتفوق..

الوقت كان عمال بيعدي عليهم بسرعه كل سؤال بياخد حوالي صفحه ونص و الاسئله كتير باقي ربع ساعه و لسه محلوش نص الامتحان حتي اللجنه ساكته خالص بس بدأ صوت عياط البنات و قهرتهم يطلع و الدكتور قاعد بكل جبروت و استخاف بمشاعرهم مبتسم و مش ساكت كأنه شمتان فيهم عشان وقفوا في صف نور.

كان خلاص فاضل خمس دقايق قام الدكتور وقف و هو ايده في جيبه.

الدكتور….عيطوا عيطوا خلي المحامي بتاعكم ينفعكم بقي وانتوا شايلينها.

نور….بصلوا بغضب محدش هيشيل الماده و كلنا هنجيب فيها تقدير كمان

الدكتور…..والله طيب لما نشوف يلا بس ركز في اخر دقيقيتين عشان الورق هيتسحب

كملوا اخر دقيقيتين و في حاله من الانهيار للبنات و الشباب ماسكين نفسهم بالعافيه و بمجرد ما الوقت خلص و بدأت الاصوات بره اللجنه تعلي و باقي الطلبه بيخرجوا من اللجان الدكتور قال للمراقبين يسحبوا الورق البنات فضلوا يتحايلوا و يعيطوا صعبوا علي المراقبين الدكتور زعق و قالهم حالا تلموا الورق بدأوا يسحبوا الورق

و هو راح بنفسه خد ورقه نور و هو مبتسم بشماته

نور…..حسبي الله ونعم الوكيل فيك احنا حالا هنروح كلنا نقدم فيك شكوي و نثبت حاله و حقنا مش هيروح و مش هنسمحلك تضيع تعبنا باهمالك

الدكتور……اعلي ما في خيلك اعملوا وافتكر انك لسه عندك مادتين تانين غير مادتي

نور…..لو هشيل السنه عشان بقول كلمه حق معنديش مشكله لو ده نصيبي الي ربنا كاتبه راضي بيه بس مش هسكت عن حقي انا و زمايلي و ربنا هيكرمنا و مش هيضيع تعبنا و تعب اهالينا معانا طول السنين دي

بدا البنات يحسبنوا عليه و هما منهارين و الشباب بداوا من عصبيتهم و استفزازه ليهم يشتموا الدكتور بالفاظ خارجه و من واحد فقد اعصابه خالص و شتم الدكتور بصوت عالي و بدأ يبقي في صوت عالي تاني و الجامعه كلها اتلمت علي صوتهم.