لقاء كارثي

مسكت موبايلها بسرعه و اتصلت علي الشرطه و عملت بلاغ سريع وادتهم العنوان لقت موبايلها بيرن نعيمه كانت بتتصل عليها و هي مش عارفه اي حاجه خالص بس كانت عايزه تقولها ان في اكتر من حجز اوردرات جاتلهم علي الصفحه و بتشوفها هتنزل المخزن امته

قفلت نادين و قبل ما ترد علي نعيمه سمعت صوت تكسير جامد و لمحت تامر ماسك شاب فيهم حادفه علي الباب الزجاج و خرجوا بره و الضرب كله بقي قدامها

فتحت بسرعه و هي صوتها باين عليه انها معيطه و مرعوبه

نادين…..ايوه يا نعيمه

نعيمه…..بخوف ايه ده في ايه انتي بتعيطي

نادين…..نعيمه الحقيني

نعيمه…..قامت وقفت في ايه يا نادين

نادين….في ناس هجمت علي محل ايه و احنا هنا معاها و الولد جايب صحابه و بيضربوا في بعض

نعيمه….ولد مين و مين بيضرب في بعض براحه مش فاهمه

نادين……في حد جاب كلب و تقريبا هو تبع مريم يا نعيمه و الكلب ده مات او هو اللي موته عشان يعمل مصيبه في ايه

نعيمه…..انتي لوحدك انتي وايه ؟

نادين….لا ميدو وسلامه و حسان و تامر و محمود و انكل احمد بس ايه جوه في المحل و هنا اصلا بيضربوا بعض جوه انا سمعاها بتصرخ و مش عارفه انزل هنا بنت حسان معايا في العربيه

نعيمه….طب اقفلي اقفلي

صرخت نادين لما شافت واحد فيهم عور سلامه

نادين…..لا لا لا

نعيمه…..نادين في ايييييه

نادين…..عوروا سلامه يا نعيمه والنبي اتصرفي بسرعه

نعيمه….طب اقفلي انا جيالك جيالك

قفلت نعيمه و جريت خدت شنطتها من جوه و لبستها علي و نزلت بسرعه من البيت بالترنج بتاعها زي ما هي كان ترنج رياضي و ينفع يتخرج بيه عادي كانت حاطه الموبايل علي ودنها تشوف ليله فين بس كان لسه غير متاح اتصلت بسرعه علي فضل.

فضل…..ايوه يا نوني

نعيمه….فضل الحقنا في مصيبه

قام فضل وقف و بمجرد ما وقف عشري و رشيد وقفوا من غير ما يعرفوا في ايه اصلاً بس منظر فضل رعبهم

فضل…..في ايه يا نعيمه حصل ايه

جملته دي لوحدها كانت كفيله توقف قلب عشري اللي مسك بسرعه موبايله اتصل علي ليله و مستناش يسمع

نعيمه…..بكلم نادين بالصدفه لاقيتها بتصرخ و بتعيط و بتقول ان في شباب اتهجموا علي ايه في المحل و غالبا هما تبع مريم جايبين كلب و مات و انا مش فاهمه في ايه بس شكل سلامه اتعور

فضل…..انتي بتقولي ايه هما فين في المحل