لقاء كارثي

ليله….طيب هتصل علي عشري اطمنوا و هرجعلك هفضل معاكي علي الخط ماشي

ايمي….طيب ماشي يلا علي مهلك روحي بس طمنيه عشان هو هيتجنن

ليله….اوك باي

ليله….تزما انا لازم امشي

توما….طيب طمنيني في مشكله بسبب البت دي مش كده

ليله…الظاهر كده يا توما و شكل كان معاك حق في كل كلمه انا لازم اتصرف

توما….متستنيش يا ليله وقفيها عند حدها وزي ما قولتلك لو حسيتي انك مش قادره تتصرفي او مش لاقيه حد ليه كلمه يقف جنبك انا موجود اديني بس تليفون وانا ساعة زمن هكون مخلصلك كل حاجه

ليله…..ماشي يا حبيبي انا همشي الوقت و لو احتاجتك هكلمك

توما….يلا يا روحي خدي بالك من نفسك ان شاء الله خير و افتكري كلامي كويس يا ليله اوعي تتهزي مهما عملت خليكي قويه

ليله ابتسمت لتوما بهدوء و طبطبت علي كتفه و بعدين مشيت

خرجت علي بره و اتصلت علي عشري لاقته مشغول كان هو بيتصل عليها وبردوا كانت مشغوله

رجعت اتصلت تاني فتح عليها من قبل ما يرن.

عشري…..انتي فين يا ليله؟

ليله….اهدأ انا كويسه ولسه خارجه و ايمي قالتلي و انا جايه في الطريق

عشري….انتي فين عشان اقابلك متتحركيش من مكانك

ليله….عشري انا بخير بقولك و جايه روح انت علي هناك هما محتاجينك اكتر

عشري…..بعصبيه هو انتي مبتسمعيش الكلام ليه انتي سمعتي انا قولت ايه ؟

ليله….ما تهدا بقيييي بقولك انا كويسه افهم شويه مريم لا عيزاني و لا عيزاك الوقت خالص مريم عايزه اللي مننا يا عشري وهي قالتها بلسانها وانا قولتها من الاول متستهونش بأي كلمه قالتها بطل بقي العصبيه اللي انت فيها دي و روح للشباب و خليك معاهم كفايه توتر اعصاب ابوس ايدك

عشري …..طب انتي فين يا ليله

ليله…..عشري انا في اخر التجمع يعني مش بعيد اوي عن البيت و طالعه الوقت علي مدينتي ربع ساعه او تلت ساعه بالكتير وهكون هناك يعني الموضوع مش محتاج انك تيجي تمشي ورايا زي الحارس اطمن انا مش هدف مريم يا عشري

عشري…..تمام طيب خليكي معايا عالخط

ليله….لا يا عشري انت هتقفل عشان انا هتصل علي ايمي و هفضل معاها عالخط عشان ايمي عملت اللي في راسها و خرجت و انا لازم افضل معاها فهمت

عشري…طيب يا ليله تمام لو في حاجه اتصلي عليا

ليله….حاضر سلام

عشري…..سلام يا ليله..

رشيد…..ايه كويسه

عشري….اه الحمد لله علي فكره مراتك جايه