لقاء كارثي

حنان….هونوا علي نفسكم يا جماعه ده انا بقول انتوا اللي هتهونوا علي البنات

اميمه…..غصب عننا احنا عيله مش صحاب ولا معارف ولا حتي قرب البنات الي قربنا من بعض جايز هما كانوا سبب بس العلاقه اللي بينا كانت اكبر بكتير من علاقه عاديه يمكن

سكتت ثواني واتخنقت بالدموع ورجعت كملت

يمكن الموضوع فارق عندي انا واخواتي مش لان احنا موجوعين اكتر لا خالص والله نجلاء وعادل و ولادهم غاليين عالكل بس انا واخواتي تحديدا ملناش حد ملناش غيرهم كلهم هنا عيلتنا واهلنا اذا كان نجلاء وعادل ولا زوزو وحماده و لا استاذ احمد بجد احنا بنعتبرهم عيلتنا عمرهم ما قصروا معانا في وقفه او سؤال او اي حاجه فا غصب عنك لما حد منك بيروح بتتوجعي

امينه….القرابه يا بنتي عمرها ما كانت بالدم و خصوصا لو اللي قدامك في طبعه الحنيه غصب عنك بتقربي منه و بتحزني لو صابه مكروه

قمر….طبعا محدش فيهم والله يا ست امينه كان يعرف ان في حد عنده حاجه و ميجيش او يسأل ديما كنت اقول لاميمه الناس دي لو مكانتش في حياتنا كانت هتبقي عيشتنا صعبه اوي

حنان…..ربنا يديم في حياتكم الناس الحلوه بس ده حال الدنيا يا قمر بنودع ناس و بنقابل ناس طب اقولك علي حاجه انا مكانش ليا بعد ربنا غير امي تعبت كتير اوي في حياتي اوي فوق ما تتخيلي و رغم ان امي كانت ست كبيره و مريضه

يعني لا كانت تقدر تساعدني في ولادي ولا تقدر تشتغل معايا وايدي بايدها عشان نعرف نعيش ولا كانت بتقدر حتي تخدم نفسها خصوصا اخر كام سنه كانت كبرت بس والله العظيم يا قمر و جودها لوحده كان كفيل يطمن قلبي وجودها ونفسها جنبي كان كفيل يديني قوه معرفش عنها حاجه وجيالي منين

امي الله يرحمها كان اقصي حاجه تقدر تقدمهالي انا و ولادي انها تحط معاش ابويا علي الفلوس اللي بجيبها من شغلي عشان نعرف نعيش بس

لكن سبحان الله انها موجوده وحسها في الدنيا كان كانه سحر مخليني بعدي كل حاجه و قادره اقف و بعمل حجات قبل ما انفصل عن الو ولادي مكنتش اقدر اعملها ولو كنتي قولتي قدام حد حنان عملت كذا او سوت كذا حنان راحت لوحدها ولا جات يقولوا مستحيل دي لو خرجت بره عالشارع من غير امعا ولا جوزها تتوه لكن امي وجودها كان فارق

بس لما راحت والله العظيم كان الدنيا اتهدت فوق مني عارفه لما تاخدي عيل صغير من ايده و تحطيه في مكان ميعرفش عنه حاجه وتسيبه لوحده اهو انا كنت كده توهت و خوفت وبقيت لوحدي لوحدي بجد و مسؤوله عن اربع ولاد اه كانوا كبروا بس عدم وجود امي خلاني بقيت خايفه لان مكانش في اهل او حد اسند عليه انا مقدره جدا كلامك و فكره ان مفيش حد حواليكي متعبه بس الحمد لله انتوا في حواليكم ناس لسه عايشه وحسها في الدنيا مش معني كلامي انكم متحزنوش بالعكس نجلاء كانت ست جميله وانا عن نفسي حزنت عليها بجد من قلبي كانها اختي والله واستاذ عادل كان شخص قمه في الاحترام و الرقي و يتحزن عليهم فعلا لكن هونوا علي نفسكم ده حال الدنيا و الحمد لله ان لسه في ناس حوالينا انا عن نفسي ربنا واحده العالم اتعودت عليكم قد ايه و حبيتكم قد ايه و كأن ربنا بعتكم ليا عشان يبقي ليا انا و ولادي ضهر وسند وعزوه