لقاء كارثي

نعيمه…يارب يا فضل يارب والنبي فرحهم و متوجعهمش اكتر من كده مش عايزه حد فيهم يحس بالعجز او ان مستقبله بيضيع نادر مبيقدرش يقعد في البيت شويه و نسمه كفايه وجعها لما تفوق و تكتشف ان السنه اللي كانت نفسها تخلصها مش بتخلص وراحت عليها

سليم….المهم هي يا نعيمه مش مهم السنه اللي هتضيع او الامتحانات كل ده يتعوض

نجود…في ستين داهيه السنه كلها حتي لو هتعيدها تاني المهم انها بخير

نعيمه…طبعا اكيد تقوم بس هي

تقي….بدموع متقلقيش مفيش حاجه هتضيع منها نسمه هتقوم و هتبقي كويسه و هتخلص السنه زي ما كانت عايزه و انا انهارده من اول ما صحيت كلمت اكتر من حد من صحابها هما شاطرين انا عرفاهم و طلبت منهم يعملوا لنسمه تلخيص بكل محاضره واي حاجه مهمه يقدروا يساعدوها بيها و بصراحه اللي كلمتهم محدش فيهم قصر و قالولي هنعمل كده و هيكلموا كمان زمايلهم اشطر منهم و هيطلبوا ان الدكاتره تساعدها يعني متقلقيش الكل حابب يساعد نسمه و بيحبوها جدا انا والله لو اقدر اعمل ده بنفسي هعملوا بس غصب عني انا بدرس حاجه وهي حاجه

نعيمه….بدموع عارفه يا تقي عارفه و ياريت بجد تعملوا كده هتفرق مع نسمه جدا المهم اصلا تقدر تعمل ده خايفه لما تعرف بموت ماما وبابا متقدرش

تقي…هتقدر و انا مش هسيبها و هتعمل ده عشانهم و عشان تفرحهم وهروح اذاكر معاها واخليها تذاكر

سليم…مش هنسيبها يا نعيمه و هتفرح و نفرحها و هنعمل كل اللي نقدر عليه ليها ولنادر متقلقيش احنا جنبك

عدي….ااا وانا والله انا كمان اي حاجه هتعوزها اروح اجيباها ورق ملازم و سليم و تقي يفضلوا معاها هروح و اي حاجه نادر هيحتاجها هعملها متخافيش

نعيمه….بدموع ربنا يخليكم ليا يارب

عسال….بابتسامه و تأثر طب بالذمه شوفتي بقي جمال اكتر من كده خايفه عليهم لما يفوقوا من الصدمه انتي معاكي ابطال يقدروا يخرجوا اي حد من اللي هو فيه متقلقيش يا نعيمه كلنا جنبك يا حبيبتي و جنب اخواتك و اهم مننا فضل اهو معاكي مش هيسيبك

فضل…..بابتسامه حزينه دي روحي اسيبها ازاي انا سايبها بس تاخد وقتها لاني عارف ان كل ده غصب عنها واللي هي فيه كبير بس انا عارف ان نوني قويه و هتقدر تقف علي رجليها من تاني و هتقدر تساعد اخواتها انهم يبقوا بخير و مش هتخلي حد فيهم يستسلم ابدا