لقاء كارثي

عمر…..بابتسامه انا كنت هعمل لكل طالب لوكر خاص بيه يحط فيه كل ادواته و كتبه لان بصراحه الموضوع مرهق علي الاطفال انهم يشيلوا كل يوم شنطه فيها كتب قد كده

مصطفي……ااااااه حبيبي اهو ده احسن اقتراح انا ياما عانيت منه والله

عسال….بضحك مصطفي كان قصير ومش باين من الارض و الشنطه بتاعته واصله لكعب رجله يا عيني و ماشي يجر فيها

مصطفي….طيب الكبير بتاعنا لو بقي وزير التربيه والتعليم هيعمل ايه

عشري الكبير…..هغير كل حاجه اسمها وزاره التربيه و التعليم و التربيه سبقت التعليم مش العكس زمان يا مصطفي كان العيل يلمح الاستاذ بتاعه حتي بعد المدرسه في الشارع عادي كان يستخبي وراء اي عربيه او يدخل اي بيت ميعرفهوش خايف المدرس يلمحه المدرس كان ليه هيبه و احترام و تقدير لكن الوقت العيل يقف يمسخر المدرس و يقل منه و يتريق عليه عشان يبان قدام زمايله انه الواد اللي مفيش منه و ان جيت للحق انا شايف ان الاهالي محتاجين تربيه قبل عيالهم

احمد……معاك حق والله يا حاج عشري الاهالي عليها الحمل الاكبر صحيح المدارس المفروض انها بتربي وتعلم بس دور الاهل في البيت اكبر لازم يكون في رقابه من الاهالي علي ولادهم لازم يبقي في مراقبه لكل تصرفاتهم لازم يبقي في سؤال دايم عنهم سواء في الدرسه او الدروس لازم يعرفوا اهالي صحابهم و يعرفوا ولادهم مصاحبين مين طريقتهم و اسلوبهم لان العيال بيقلدوا بعض

عشري الكبير……شوف يا استاذ احمد انا مش ضد ان العيل يبقي مفتح دمه خفيف شقي و بالاخص الولد بس لازم يكون في حدود بينه وبين استاذه في احترام يبقي شاطر

رشيد….هو مع احترامي لكلامكم طبعا انتوا صح في كل حاجه بس الزمن اتغير يعني زمان الاستاذ كان ليه هيبه فعلا و ليه شكل وطريقه واسلوب ونظره و مشيه حتي في لبسه كان مختلف بس الوقت الوضع اتغير زي ما الجيل نفسه اتغير المهنه نفسها اتغيرت و ثقافة المدرسين اتغيرت فا ايه المانع يكون المدرس صاحب و دمه خفيف بس في الجد الطالب فعلا يحترمه يعني مش لازم الطلاب يخافوا ويكشوا من استاذهم انا بشوف برضوا عي قد ما كان زمان التعليم افضل بس برضوا الشده مش مطلوبه طول الوقت

جمال….معاك حق جدا المدرس لو بيتعامل علي انه صاحب او اخ كبير او اب و بيتعامل بلين بس في نفس الوقت ليه شخصيه التعليم كان هيبقي في حته تانيه