لقاء كارثي

الشخص الوحيد اللي زعلني و مقدرتش اتقفل منه كان عشري و هنا انا مش بس اكتشفت اني حبيته بجد او اتعلقت بيه لا انا حسيت بعقده الروح اللي قولتلك عليها دي روحي كانت عنده وانا بعيد كنت زعلانه منه ظاهريا انما كل اللي جوايا بيحبه ودي كانت غريبه بالنسباي لان مش انا الشخصيه دي خالص فا بصراحه و من غير كدب
عشري لو مكانش عمل كده مكنتش هصدق حبه جايز اكون كسرت وبهدلت و محمود طبعا و سليم و عدي شاهدين

علي…بضحك وانا كمان ده انا حبستك بايدي يوم عمليته

ليله….بضحك وعي كمان بصراحه علي قد ما اتصدمت من المصيبه اللي عملوها كلهم فيا علي قد ما جوايا كان بيضحك ومبسوط يعني انا كنت عارفه اني راجعه راجعه لعشري بس ازاي معرفش كان لازم حاجه ترجع كرامتي و بيتهيالي انه يتجوزني من غير ما اعرف و يصمم كان اكبر رد علي حبه ليا فا الراجل ده انا بحبه و بنتمي ليه و بحب حياتي معاه و كنت اتمني اني اعرفوا من زمان و يمكن انا زعلتوا واتماديت معاه كتير بس هو عارف انه كان غصب عني فا بجد من كل قلبي بحبك و لو زعلت متزعلش مني يا اعظم و احن راجل في الدنيا

ابتسم عشري بهدوء باس كفها قدام الكل وضمها لصدره بحب

و طبعا الكل عمال يصفرلهم و يسقفلهم و اميمه وامينه شغالين دعاوي

عشري….بحب انا معنديش كلام اقولوا يمكن ليله مفيش بجد كلام يكفيها انا مبعرفش اتكلم كتير بحب اكون راجل افعال اكتر بس بعيداً عن الكلام والافعال والله العظيم هي حقيقي مفيش كلام ليه وصف ليها في حياتي انا اكيد مش زعلان منك ولا ينفع ازعل و كل رد فعل حتي لو كان قاسي كان حقك لان انتي ست عارفه قيمه نفسها كويس ست عارفه يعني ايه كرامه و يعني ايه ثقه في النفس طبعا ماعاش ولا كان اللي يفكر يهزهم بس كان حقك

و انا كنت راضي بكل حاجه الا انك تبعدي عني لحظه و عرفت ارجعك و مكانش اصلا قدامك اي اوبشن غير انك ترجعي لاني مكنتش هسيبك مهما عملتي

ليله بالنسبالي حياه عيشتها بجد لما هي ظهرت في حياتي كل الظروف الوحشه اللي مرينا بيها اوقات مبحسش انها وحشه بالعمس بحس انها ذكري و مغامرات ومواقف كل حاجه فيها كانت بتخلق جوايا انا وهي طريق بيوصلنا لبعض

انا عمري في حياتي ما تخيلت اني ارتبط او اتجوز و اعيش حاله الحب دي او اني اربط حياتي رهن اشاره ست بس مع ليله كل الحسابات اتغيرت و دي حقيقه سعادتي مرهونه بسعادتها حياتي مرهونه بحياتها رد فعلي مرهون برد فعلها