لقاء كارثي

ايمي….احنا فين و فرح ميدو فين يا رشيد لسه قدامنا اسبوع بحاله الفرح هيبقي الاتنين الجاي زي انهارده بجد انت بتتلكك

وفاء…. انت يومين تلاته بالكتير وهتبقي كويس دي مش جراحه كبيره يعني

رشيد…يا امي ما هي عمليه ليزر يعني هي سحر مثلا ما فيها جراحه وكوي و حفر و ليله زرقا ثلاث ايام ايه دي اللي تقفل فيهم

ايمي…..يا سيدي حتي لو مش ثلاث ايام هنقول هتاخد اسبوع مشكلتك فين انت

رشيد….مشكلتي اني في فرح و في سفر وطريق

ايمي…..اسوق انا او بلاش عشان متتلككش هنركب مع ليله وعشري هنركب مع اي حد مش قصه يعني يا رشيد

وفاء…..ليها حل يا حبيبي بس رجلك كده هتقرفك تعملها واخلص عشان في الاخر برضوا هتهرب و هترجع تعملها

ايمي….لا هو مش مقتنع ان نهايتها عمليه رشيد بيخف شويه يشيل الموضوع من دماغه و يبقي مذبذب يتعب يقولي لا والله لا هعملها

رشيد…..بابتسامه قصدك اني عيل

ايمي….انت اعيل من العيال يا رشيد بجد معرفش ليه خايف كده

وفاء…. بابتسامه علي فكره رشيد من صغره كده بيخاف من العلاج و اي دواء بيترعب من الحقن بيمووت من القطره بيخاف من المستشفيات

ايمي….لا حوار العلاج والادويه ماشي عرفاه انما انت لو تعبان غصب عنك مضطر تاخد حقن وادويه غصب عنك محتاج تروح لدكاتره ومسشفيات

رشيد…بضحك انا نفسي اعرف انتي متعصبه كده ليه

وفاء….يا حبيبي مضايقه عشانك و خايفه عليك

ايمي…لا بجد يا فوفا رشيد مستفز جدا و واخد الموضوع ببرود فظيع

رشيد….ليه برود عملت ايه طيب

ايمي….عملت ايه انت من وقت ما رجلك بدأت تشد عليك و انت عايش في توتر و مزاج زي الزفت من فكرة انك مضطر تعملها يتعب اوي يقتنع يحس انها خفت شويه او المايه الدافيه ريحتها يقولي لا لا بلا عمليه بلا بتاع المشكله ان وهو تعبان بجد بيبقي علي اخره رجله كلها بتبقي شاده عليه ماشي يعرج رافع مشط رجله عشان صباعه ميلمسش الارض و انا مبعرفش اشوف حد قدامي تعبان و معرفش اتصرف اصلها لو هتخلص علي مسكن ماشي انما دي ملهاش مسكن و انا مش عارفه اتصرف و انت تعبان كده ليه العذاب ده كله ما تعملها و تخلص

رشيد…..بابتسامه هاديه خلاص يا ايمي حاضر هشوف كده هعمل ايه و هقرر

ايمي….لسه هتقرر وتشوف ؟ بقولك ايه يا رشيد انت حر اعمل اللي يريحك انت اللي شايف نفسك تعبان قد ايه و انت اللي شايف تقدر تتحمل و تكمل في العذاب ده ولا لا فوفا انا هشوف البنات