لقاء كـ،ـ،ـارثي

نعيمه…مش هقفلوا والله و هجيب كمان خط اماراتي و هبقي اكلمكم منه عشان يبقي معاكي الرقمين

فضلت تكلمهم شويه و بعدين قفلت و اطمنوا كتير عليها و هي كمان المكالمه فرقت معاها.

قفلت وقررت تتصل علي صحابها
و لاقتهم مرجعين رقمها علي الشات بتاعهم سمعت طبعا رسايل ايمي كلها و سلمي وايه و نادين حتي ليله و عرفت انها رجعت من السفر و قررت تتصل عليهم ڤديو عشان تكلمهم كلهم مره واحده مكانتش تعرف انهم مع بعض في الافتتاح

رنت و اول حد شاف اتصالها ايه

ايه…..بنات الحقوا نعيمه بتتصل علي الجروب

ايمي…ردي بسرعه

قربت منهم ايه و فتحت الموبايل كانوا في تربيزه هاديه بعيده شويه عن الدوشه و كانوا لوحدهم من غير الشباب.

اول ماشافتهم ابتسمت بتأثر وحاولت متعيطش.

سلمي…..كده يا نعيمه توجعي قلبنا

ايمي….انتي عارفه لو قدامي هديكي مليون شبشب يا حيوانه عشان انا هموت عليكي و مهانش عليكي حتي تبعتي رساله تطمنينا

نعيمه….حقكم عليا لسه فاتحه الموبايل والله وحشتوني

ايه….بابتسامه وهي ماسكه الموبايل بت يا نوني هو السفر بيحلي كده مالك قمر كده ليه

نعيمه….بضحكه جميله وحشتيني يا جزمه

نادين….انا زعلانه منك اوي كنتي قوليلي ان حضنك ده وداع طيب عشان احضنك اوي

نعيمه….بضحك مسحت دموعها وداع ايه يا هبله انا مهاجره وحشتيني

نادين….انتي وحشتيني اكتر

نعيمه…..حمد الله علي السلامه يا لولي

ليله….بابتسامه هاديه المفروض انا اللي اقولك كده مكنتيش قادره تستني لما ارجع يا نعيمه

نعيمه….حقك عليا والله

ايمي…..انتي فين بالظبط احنا عرفنا انك في الامارات بس قاعده فين

نعيمه….بضحكه هاديه مش مهم بعدين هبقي اقولكم بس انا بطمنكم اني بخير

ايمي….انتي هترجعي وده مش بمزاجك علي فكره

ليله…..سافرتي ليه يا نعيمه و ليه عملتي كده و ايه اللي بينك وبين فضل

نعيمه….ليله انا بكلمكم عشان حاجه تانيه خالص عشان اطمنكم و اعتذرلكم بس انا مش قادره اتكلم في اي حاجه

ليله….لا هتتكلمي عشان انتي مش عايشه في الدنيا لوحدك ولا انتي واحده غريبه سافرت و بوظت دنيتها هنقول عادي احنا معاكي في الدنيا دي و في حياتك زي ما انتي معانا في كل حاجه

نعيمه….كل اللي عيزاكم تعرفوا بس ان فضل ملهوش ذنب في اي حاجه و لا اصلا كان يعرف اني مسافره واخر مره شوفتوا قبل ما اسافر مكانش في حاجه بينا صدقيني بس انا اللي مش كويسه و محتاجه بريك و عايزه ابقي مع نفسي شويه