لقاء كـ،ـ،ـارثي

نادين….انت هتقلقني ليه استني

قربوا من العربيه فتحتها و فتحت الباب اللي جنبها الشنطه كانت علي الكرسي

عسال….مفيش قلق ولا حاجه كمل بابتسامه يمكن هديه يا فقري

نادين….هو انت قلقتني لان نعيمه كمان طلبت مني اروح اودي لنسمه ورق لانكل عادل حتي قالتلي مش هقدر اروح ولا اكلم نسمه عشان شاده معاها شويه

عسال…. ورق ايه

نادين….معرفش هي قالتلب اديه لنسمه توصلوا لبابا معرفش بقي و طلبت مني اوصل ده لفضل

فضل…..ايه البوكس ده و ليه قفلته بالسلوتيب كده

عسال…..طيب شوف افتحوا

فضل يشيل اللزق من علي الغطاء بتاع البوكس وهما واقفين جنبه عندهم فضول يعرفوا في ايه

شال اللزق كله و شال الغطاء و بص بصدمه اول ما لقي الدهب كله موجود و لمح علبة الخاتم

عسال اتصدم و بص لنادين كانت نفس صدمته بصلهم فضل بنفس الصدمه ويمكن اكتر ثواني مرت محدش فيهم نطق مسك الرساله اللي كانت فوق فتحها بهدوء.

و بدأ يقرأ كلامها..

انا مش عارفه أبدأ كلامي منين ولا عارفه اقولك ايه.
الحاجه الوحيده الي عرفاها يا فضل و متأكده منها ان بمجرد ما تقرأ الكلام ده جايز تكرهني جايز تغضب تتعصب جايز كمان تعتبرني موت بالنسبالك حقك و عمري ما هزعل منك بس غصب عني يا فضل يمكن ده احسن ليا و ليك و يمكن ليك انت اكتر ربنا شاهد اني مشوفتش منك غير كل خير و كل وقت عيشتوا معاك انت مقصرتش فيه معايا بس انت تساهل اكتر من كده بكتير تساهل حد يقدرك و يقدر حبك انا مضغوطه يا فضل و مش كويسه و مكانش ينفع اكمل بالشكل الوقت عمال يقرب يا فضل وانا حالتي بتسوء جايز تكون مصدوم مني و فيا حقك والله العظيم بس قدام شويه هتتأكد ان اللي عملتوا ده احسن بكتير ما كنا قربنا و بقينا مع بعض و حياتنا فجأه اتحولت لحياه لا انا ولا انت نتمناها بس والله العظيم يا فضل انت غالي عندي اوي و زعلك مني يمكن تكون اكتر حاجه كسرتني وهتكسرني سامحني يا فضل انا مش هقدر اكمل و ربنا يسعدك مع حد يستاهلك بجد و يقدرك اكتر مني هتفضل غالي و قريب و هفضل افتكرك بكل خير

نعيمه….

نزل فضل الورقه بهدوء و هو مش باصص لحد الصدمه و الغضب اللي بان علي ملامحه كانت اكبر من اي كلام

نادين….فضل قول حاجه الورقه دي فيها ايه نعيمه مالها وايه الحاجه دي و ليه سابت خاتمها

عسال…فضل في ايه انتوا زعلانين طيب