لقاء كـ،ـ،ـارثي
اتصلت علي ابوها و هي خايفه و متوتره من رد فعله بس كان لازم تطمنهم.
عادل…..بلهفه نعيمه انتي فين يا بنت الكلب
نعيمه….بدموع وابتسامه وحشتني
عادل….كده يا نعيمه كده هونت عليكي انا وامك طب مش عايزه تتكلمي افهمها بس طمنينا عليكي من يوم ما مشيتي لا نعرف وصلتي كويسه فيكي حاجه ولا لا
نعيمه….حقك عليا انا كويسه وزي الفل والله العظيم
عادل ….لا انتي مش كويسه مطمنتناش ليه يا بنتي
نعيمه….حقك عليا والله بس كنت لسه بدبط نفسي وكنت مش قادره بس انا بخير
نجلاء….اديهالي
عادل….استني نعيمه عملتي ليه كده يا بنتي حصل ايه
نجلاء….افتح طيب الاسبيكر
عادل…اهو
نجلاء…..انتي ازاي تعملي فيا كده ها هونت عليكي طب ليه معرفتيناش علي الاقل نشوفك ونسلم عليكي ولا احنا مش فارقين معاكي
نعيمه….متقوليش كده و الله العظيم غصب عني لو كنت قولت كنتوا هتسألوا وانا مكنتش قادره اتكلم ولا عندي حاجه اقولها غير اللي قولتوا في الرساله بس حقك عليا انتي وبابا و الله العظيم كنت مستنيه اهدا شويه وافتح الموبايل واتصل
نجلاء….حصل ايه يا نعيمه فضل عملك ايه
نعيمه….ولا حاجه والله العظيم محدش عملي حاجه وانا اصلا مش قادره اتكلم انا بس حسيت اني مضغوطه و محتاجه ابعد مش اكتر
عادل….من ايه يا بنتي وحتي لو هتبعدي فضل ليه تسيبيه
نعيمه….عشان خاطري يا بابا اقفل الموضوع ده فضل احسن حد في الدنيا قابلتوا بس انا مش قادره و مش حابه افضل معاه وانا جوايا اللغبطه دي
نجلاء….طيب انتي زعلانه مع حد من البنات او في حاجه في شغلك
عادل….ناقصك فلوس يا نعيمه
نعيمه….والله العظيم ولا اي حاجه محتاجه بس ابقي مع نفسي فتره بس انا كويسه عيزاكم بس تدعولي و محدش فيكم يزعل فضل او يحسسوا ان هو الشبب لان والله العظيم لاخر لحظه فضل كان كويس معايا صدقوني
نسمه…..نعيمه ارجعي و النبي و خلينا نتكلم
سمعت نعيمه صوتها نزلت دموعها اكتر
نعيمه…..نسمه خدي الموبايل عايزه اتكلم معاكي
خدتوا نسمه منها و قفلت الصوت
نسمه….معاكي
نعيمه…..اقفلي الصوت
نسمه….تمام اتكلمي
نعيمه….اوعي تفكري اني عملت كده بسببك و حياة غلاوتك عندي علاقتك انتي وسليم بره عن اللي حصل ده خالص و انا بقولك تاني حقك عليا وانا اسفه و مكنتش حابه ابقي وحشه قدامك كده بس والله العظيم انا مبسوطه و كمان اني اسيب فضل ده مش بسببك ولازم تبقي واثقه من ده كويس يمكن بس انا وقتها كنت بفكر في كل اللي حصل ده سفري واني ابعد واني اسيب فضل و معرفش ليه طلعت ده كله عليكي بس متزعليش انتي عمرك ما كنتي بتاعت مشاكل ولا كنتي حد وحش انتي اطيب واحن اخت في الدنيا وانا بحبك اوي اتبسطي و متزعليش ولا تفكري في اي حاجه سليم جميل ويجنن و مؤدب ومحترم وربنا بيحبك عشان هو من نصيبك
