لقاء كارثي

نعيمه….كسروني يا ليله كسروني اوي هما جسمهم اتدفن بس انا روحي اللي اتدفنت معاهم

ليله….بعد الشر عليكي فوقي يا نوني بقي فوقي يا قلبي ادعيلهم و ارجعي اقفي تاني و كملي نسمه اهي ربنا نجاها وخرجها منها علي خير و نادر باذن الله قريب هيفوق و يبقي زي الفل و تاخديهم في حضنك حاولي يا نعيمه عشانهم

نعيمه….انتي فاكره اني كده مش بحاول انتي عارفه يا ليله انا نفسي يعرفوا بس عشان افضل اصرخ اصرخ لحد ما اقع من طولي عيزاهم يفوقوا ويعرفوا عشان اعرف احزن علي امي و ابويا براحتي انا لسه محزنتش يا ليله لسه مخرجتش وجعهم اللي قابض علي قلبي اللي مانعني اني خايفه يجرالي حاجه عشان اخواتي انا بحاول و قدامك اهو لسه بخير بس والله يا ليله والله العظيم انا مش بخير خالص انا نفسيا هلكانه انتي عارفه لما بفتكر كلامي معاهم قبل الحادثه بحس اني مخنوقه والله العظيم يا ليله انك يا امي كنتي حاسه

ليله….طبعا بيحسوا يا نعيمه

نعيمه…قبل ما تيجي انتي خرجت وهي مبسوطه بالعبايه البيضه وقعدنا نتكلم كانت فرحانه بشكله و عماله تقولنا انا ليه مكنتش بحي الابيض ليه معنديش لبس ابيض طلع شكلي حلو فيه انا عمري ما لبست ابيض غير وانا عروسه و انا في العمره كانت حاسه ان ده اخر لون هتلبسوا يا ليله

ضمتها ليله في حضنها و فضلت نعيمه تعيط بوجع وقهر

ليله…..وحياتي عندك كفايه بتتعبي نفسك يا نعيمه

نعيمه….مش مهم ياريتهم يرجعوا وانا اموت نفسي مش اتعبها بس

ليله….اديكي بتقولي ياريت مكانش حد فينا غلب يا نعيمه بس انتي لازم تكملي وتعيشي و مينفعش الحزن يفضل عامل فيكي كده بياكل في روحك

نعيمه….ماهو انا هتجنن مش عارفه اكون كويسه والله العظيم بحاول بصلي و بدعي وبقرا قران و بستغفر بس جوايا نار يا ليله نار مش بتتطفي حاسه اني لو حطيت تلج علي صدري هرتاح.بس مش برتاح و نسمه جات كملت عليا بأسئلتها هي نفسها تقوم عشان تروح تشوفهم و تطمن عليهم بحاول اتخيل اقسي حاجه لصدمه نسمه لما تعرف بحاول اتخيل اقسي انهيار ممكن توصلوا بحس ان اي حاجه في كل اللي بفكر فيه ده هتموتها اصل شوفي انا عامله ازاي نسمه ونادر كانوا ماعلقين بامي وابويا اكتر هما عايشين معاهم بحاول اتخيل اول مره يرجعوا فيها البيت هيحصل معاهم ايه قلبي واجعني اوي يا ليله اوي