لقاء كارثي

عارفه يا نعيمه انا لما مني مراتي اتوفت والله العظيم يا بنتي لو قولتلك اني حزنت و اتوجعت و مازلت بتوجع عليها لحد انهارده اكتر من ابويا وامي هتقولي عليا اني ببالغ امي وابويا لما ماتوا كنت صغير في السن يعتبر شاب اكيد حزنت و اتوجعت و عيطت و وقتها حسيت ان ضهري اتعري بس والله العظيم الوجع اللي حسيته في فراق مني كان وقتها اكبر بكتير من احتمالي

وقتها كنت بقيت انضج مسؤول عندي ولاد عندي حياه بس موتها رجعني عيل صغير طفل حس انه اتيتم و ده مش مبالغه انا بجد حست وقتها اني يتيم و لوحدي في الدنيا و يمكن جه عليا وقت حسيت اني لو فضلت كده هكفر لان كلمه ليه يارب مكانتش بتتقطع من لساني

مش هكدب عليكي كنت رافض و مكنتش راضي و كنت حاسس ان استغفر الله العظيم ربنا جه عليا بزياده لانه حطني في اختبار لا كنت عامل حسابه ولا مستعد ليه زيك بالظبط ولا كنت حاسس اني هقدر اربي العيال دي لوحدي مع انهم مكانوش صغيرين اوي يمكن ايه اللي كانت صغيره شويه بس كانت واعيه لكن حسيت اني مش هعرف هي كانت بتعمل كل حاجه شايله عني بلاوي اكتشفتها بعدين وجايز وقتها كنت مش عارف انها بتتعب او شايله عني كده

خوفت افشلهم دراسيا واخلاقيا لان تربيه الست بتفرق عن تربيه الراجل وانا كان معايا بنتين خوفت اوي مقدرش اكون قد تربيتهم

في الوقت ده يا نعيمه بص لسلمي ثواني و عيونه دمعت و دقنه بقت تترعش من الوجع بصتلوا سلمي و عيطت و البنات كلهم دمعوا معاهم

احمد….ااا احم في الوقت ده سلمي شالت عني كتير اتحولت با قلبي من بنت امها سابتها فجأه لام ليا ولاخواتها

طبطب حسان علي ضهر سلمي و بعدين مسك كفها باسه

احمد……زي ما تقولي ربنا حط في قلبها هي ايمان ورضا و قوه مكانتش عندي انا شخصيا كانت هي اللي بتواسيني و بتاخدني في حضنها كانت ام لايه لان ايه يا قلبي اتحرمت من امها مرتين مره من امها الحقيقه و مره من مني

نزلت دموع ايه

احمد…….سلمي شالت عني فتره لحد ما قدرت اقف علي رجلي كانت بتقوي تامر عشان يذاكر لان تامر كان متعلق بامه تعلق فظيع و كانت بتقويني و كانت ام بديله لأيه لحد ما وقفت قدام نفسي في يوم وقولت لا بنتك هتكلع اجمد منك دي هي محتاجه حضن و طبطبه فوق
وفوقت و رضيت و قربت من ربنا اكتر بكتير من الاول و خدت ولادي في حضني لان مكانش قدامي حل غير ده لو وقعت انا كمان هما هيتبهدلوا و عدينا المرحله دي و بعدها ربنا طبطب علي قلبي و رزقني بصحبه حماده و ابوكي اللي كانوا لولادي زيي بالظبط رزقهم بزوزو ونجلاء و كان ربنا بيقولي بعت اللي يطبطب و يصون و يحفاظ علي ولادك معاك و يشهد ربنا ان عشرتهم كانت ونعم العشره حبيت ابوكي و حماده يمكن اكتر من اخويا صاحب نايم قاعد بشوفهم بكلمهم كانوا ونعم الونس اوعي تفتكري ان ابوكي موجعنيش يا نعيمه ابوكي خد حته من روحي بس ده حال الدنيا يا بنتي يفضل بتاخد مننا واحد وراء التاني و حته من روحنا تتاخد معاه بس تفتكري يا نعيمه لو استسلمت مين هيقوي عمك حماده اللي هيموت علي ابوكي