لقاء كارثي

رشيد….ايوه صحتها تبقي احسن شويه و تطمن ان الهيمجلوبين بقي افضل تنزل علي الاقل هتبقي قريبه هنا من البنات كلهم

سلامه…طيب بصوا يا شباب من هنا لحد ما ليله تقدر تنزل انا هتابع المطعم مع ريهام عشان مسيبهاش لوحدها ريهام مهما كانت بقت فاهمه فاهي لسه برضوا محتاجه حد معاها وانا اكيد فاهم في الشغل هشيل انا عن ليله وايمي و هساعد ريهام و بالنسبه لايه زي ما سمعتوا هي حاليا متشتشه من حوار شغلها اللي حصل مأثر عليها لسه فا هتفضل مع نعيمه

يعني تقدروا تعتبروني انا و ايه موجودين عشان برضوا عشري يشوف شغله لو فضل محتاج بعمل مشوار يروح البيت يجيب حاجه ليه محدش يبقي قلقان هنبقي احنا موجودين

فضل….انا بصراحه محتاج كذا حاجه امي مجابتش اللي طلبته

سلامه…خلاص روح انت وملكش دعوه لما ترجع بليل روح وايه معاها و اكيد ليله هتبقي رجعت بس انت يا رشيد خد ايمي روحها خليها تفصل يومين علي الاقل

رشيد….هقولها والله حتي لو مش عايزه ترجع البيت خلينا عند زوزو اهو تبقي قريبه

عسال…انا هشيل الكافيه بدل سلامه يعني لو هو مش موجود انا تمام و نادين برضوا هي شغلها اصلا جنب نعيمه و هي اصلا مش هترجع الوقت يعني موجوده مع ايه

فضل…..ميدو انت لسه يا حبيبي انت ومراتك عرسان جداد و حتي سلامه وحسان و ده اصلا اللي مضايق نعيمه خدوا بعضكم انتوا وارجعوا واهو اليومين اللي ليله هتقعدهم معاها انتوا تفصلوا شويه و لو في حاجه اكيد هعرفكم

عشري….فضل بيتكلم صح يا شباب ارجعوا انتوا و اهو علي الاقل نادين تقعد شويه مع اهلها قبل ما يسافروا يا ميدو و بعدين ملحقتوش يا حبيبي تقعدوا في بيتكم هما يومين وحصل اللي حصل

عسال….مش وقته يا عشري احنا في ظرف خارج عن ارادتنا انا عارف ان لا فضل ولا اي حد موجود مع نعيمه هيقصر بس دي اصول و حتي لو فرضنا ان انا عايز ارجع مقدرش اقول كده لنادين مش هتقدر تسيبها و انا لو مكانها مش هقدر اعمل ده فا انسوا بقي حوار عرسان جداد والكلام ده لان احنا في وضع مش حلو

سلامه…..احنا هنظبطها يا شباب متشيلوش هم بس حاليا نعيمه محتاجه تحس ان الكل واقف جنبها و نقويها خلينا نعدي الثلاث ايام دول علي خير وبعدها نشوف هنعمل ايه

حسان….ان شاء الله حد من اخواتها يكون فاق كمان و تطمن بيهم اكتر