لقاء كارثي

كأن الفرح عندي ضيف مستعجل يدخل يسلم ويمشي قبل ما ألحق أفرح حتي بيه.

عارف احساس لما تبقى واقف قدام حاجه نفسك فيها من زمان ولما تيجي تلمسها تلاقيها بتبعد خطوه؟ هو ده أنا طول عمري.

كأن نصيبي من الفرح اتفاق غريب معاه يديني الحلم علشان أشوفه بس نادر أوي ما يسيبني أعيشه كامل.

انا مش زعلانه يا عشري انا راضيه بس نفسي احضن فرحتي بايدي للنهايه قبل ما الحزن يسرقها مني..

بااااك

غمض عشري عينه بقوه و هو هيموت عليها فهم الوقت كلامها كان علي ايه و تقصد ايه ليله كانت بتجهض و مقهوره علي فرحتها اللي ملحقتش تحضنها بايدها و مكانتش قادره تنطق و بتتالم في صمت الم جسدي و الم في الروح عينه اتملت دموع في اللحظه دي و هو باصص للارض و في نفس اللحظه دي قرب ابوه منهم

كان حوالين عشري صحابه و اخواته و تامر و حودا و وليد و كل الشباب و الرجاله و كان توقيت ابوه في الوقت ده مناسب جدا عشان يطبطب علي قلبه بكلامه..

قرب عشري الكبير بهدوء

سليمان….تعالي يا باااه اقعد

عسال…..تعال يا عمي اقعد هنا

عشري الكبير….لاه خليك يا ولدي انا مرتاح سكت ثواني و بعدين بص لعشري ونادي عليه محمد !!!

رفع عشري عينه بسرعه لابوه و هو حزن الدنيا في عينه و قام وقف باحترام قدامه

عشري الكبير…..ودي اقولك كلمتين في الاول انت واخواتك سبعه و امك مسقطه مرتين يعني كان زمانكم تسعه الحمل و السقط مش نهاية الدنيا يا ولدي بنتمني و ندعي و نحلم و اللي رايده ربنا بيصير اذا زعلت تبقي بتعترض علي امر ربنا واذا حمدته ورضيت بيجبر بخاطرك و بيراضيك اكتر متزعلش يا ولدي عارف ان الضنا غالي و غالي اوي كمان بس الله غالب و بيكرم و كيف ما بيديك بياخد منك ملناش في روحنا اي شي ربنا اداك و قبل ما تفرح خده منك خلاص امانته و شايف انه مش وقتها براحته يسوي فينا ما بداله نحمده ونشكره علي نعمته الكامله و نعمته اللي خدها منينا و نقول الحمد لله ماشي يا ولدي

هز عشري راسه بهدوء و هو قابض علي التيشرت بايده كانه قافل علي الدم اللي هو كان هيبقي ابنه

عشري….بهدوء الحمد لله

عشري الكبير….تستاهل الحمد

حماده…..انت ومراتك صغيرين يا حبيبي و ان شاء الله ربنا يعوضكم بكل خير

احمد….المهم سلامتها يا عشري

عشري الكبير…ايوووووه قالها عمك احمد المهم سلامتها ودي تاني حاجه رايد اكلمك فيها و الاهم كمان الضنا غالي بس لو ربنا كاتبلك الخلفه ياولدي تقدر تجيب ضناك من اي مره