لقاء كـ،ـ،ـ،ـارثي

رحاب….بابتسامه ايه ده ايه المفجاه الحلوه دي

ابتسمت رضوي وقريت منها حضنتها وسلمت عليها

رضوي….عامله ايه

رحاب…..انا بخير الحمد لله مقولتيش ليه انك جايه

رضوي….بابتسامه قولت اعملهالك مفجاه و كده كده انتي اجازه انهارده

رحاب….احلي مفجاه يا روحي مجبتيش الولاد معاكي ليه

رضوي…..بفصل منهم شويه بقي

رحاب….بضحك حرام عليكي دول قمرات سيباهم مع الناني ولا مع جوجو طيب

رضوي….مع الناني بس عرفت جوجو و هي هتتابعهم او هتخليها تنزلها بيهم

رحاب…..طب تعالي اقعدي تشربي ايه

رضوي….ولا حاجه عايزه مايه بس

رحاب…انا لسه عامله نسكافيه هعملك و نشرب مع بعض

رضوي….بابتسامه طيب تمام

راحت رحاب علي المطبخ تعمل قعدت رضوي و هي مش عارفه تبدأ الكلام منين وازاي الموضوع كان تقيل عليها و في نفس الوقت هي في موقف محرج مع حماتها والطبيعي انها تخاف علي بيتها مش حابه الموضوع يوصل لعبدالله او يضايق ويعمل معاها مشكله مش عايزه تجرح اختها لانها الكبيره و كمان مضايقه من الموضوع كله و مش حباها تظهر بصوره وحشه قدام اهل جوزها ..

دقايق بسيطه وقربت رحاب بابتسامه

رحاب……نورتي يا رودي

رضوي….بابتسامه ده نورك تسلم ايدك

رحاب…..شوفي كده لو عايزه سكر زياده

شربت رضوي حاجه بسيطه

رضوي….لا حلو اوي تسلم ايدك

رحاب….تسلمي ياروحي ايه الاخبار عبدالله عامل ايه

رضوي…..بخير الحمد لله

رحاب…..انتي جايه لوحدك ولا هو اللي وصلك

رضوي….لا جايه لوحدي عبدالله عنده شغل انا قولتلوا هروح اقعد مع رحاب شويه وبعدين هجيب شويه حجات ناقصه الولاد وهرجع

رحاب…طيب انتي مالك ليه حساكي مش تمام متخانقين ولا ايه

رضوي….لا خالص خناق ايه بس كله تمام

رحاب…..طب فيكي ايه حساكي مش مبسوطه

رضوي….بهدوء سابت النسكافيه و بصتلها بابتسامه بسيطه اااا بصي يا رحاب انا في موضوع عايزه افتحوا معاكي و مش عيزاكي تزعلي او تفهميني غلط واتمني تقدري موقفي

رحاب…..بصتلها بهدوء في ايه يا رضوي اتكلمي حاسه كده انك جايه تاني تتكلمي في حوار فضل و الصور و هنعيد نفس القصه

رضوي…..اه يا رحاب هتكلم في موضوع فضل بس مش هعيد نفس القصه انا هتكلم معاكي في حاجه جديده حصلت

رحاب…..باستفهام ايه اللي حصل

رضوي……اول امبارح بليل اتفاجئت بجوجو طالعه عندي و اتكلمت معايا و لولا ان امبارح عبدالله كان موجود في البيت كنت جيتلك لاني من وقت ما طلعتلي وانا مش عارفه انام ولا مرتاحه