لقاء كـ،ـ،ـ،ـارثي

تامر….لا معلش يا متر مش فاهم يعني ايه لو حد غلط نسكت ؟

احمد….يعني تسكت خالص عشان الموضوع ميكبرش انت مش جاي خناقه

المحامي…تامر احنا مش في موقف نكسبه بالصوت إحنا في موقف ممكن نخسره بكلمة

انا كل اللي يهمني ان اللي هيحصل هنا لازم يبان قدام أي حد إن كل طرف جاي بإرادته الكاملة من غير ضغط من غير تهديد من غير انفعال

بص لهم بنظرة أخيرة ثابتة
اللي هيتكلم يا جماعه هيضيع حق نغم بإيده سكت لحظة وبصلهم
فاهمين خطورة الموقف؟

احمد….اطمن يا متر حق نغم مش هيضيع و محدش فينا هيتكلم الا من خلالك و الكلام ليكم انتوا الاتنين بالاخص مش عايز حد فيكم ينطق او كلمه تستفزه احنا عايزين نمضي علي العقد و هما يمضوا تنازل و كل واحد يروح لحاله مش عايزين حق البنت يضيع

تامر….و افرض هي و لا اللي اسموا هاني ده قالوا اي كلمه عليها او علي اختها

المحامي….ولا كلممممه خالص

احمد….يا ابني نستحمل اي حاجه احد ما ناخدي اللي عايزينوا مش عايزين نضيع حق نغم بيقولك مش قانوني يعني ممكن فعلا يقلبوها ضدها و حقها يروح خالص

سلامه….بهدوء بص لنغم متقلقيش احنا هنا معاكي و محدش فينا هيتكلم خالص

حسان….بص للمحامي اطمن يا متر محدش هيتكلم احنا مقدرين الموقف و خطورته و اكيد مش هنبوظ الدنيا

نغم كانت بتسمعهم و بتلف بعينها علي واحد واحد وهو بيتكلم..

المحامي….بابتسامه بسيطه كده تمام المهم متنسوش احنا جايين هنا ليه.

هزوا راسهم و سكتوا و طلب منهم يتنقلوا علي طاوله تشبه السفره قعد هو في المقدمه جنبه علي الشمال نغم و جنبها تامر و جنبهم سلامه و علي يمينه احمد و حسان وساب مقدمه الطاوله التانيه بالكراسي اللي جنبها للمحامي و مريم و هاني بعد وقت بسيط دخل شاب بيشتغل مع المحامي قالوا ان مريم واللي معاها وصلوا..

نغم اول ماسمعت فضل قلبها يدق بعنف كانت حاسه ان هيغم عليها من الرعب و الخوف بصت لاحمد و هي بتاخد نفسها

احمد…بهمس هادي و ابتسامه متخافيش انا معاكي اهدي

هزت نغم راسها و بعدين بصت بعينها علي الباب بدأت تسمع صوت خطوات و صوت كعب عالي و مع كل خطوه دقات قلبها تعلي اكتر

لحد ما لمحت في المقدمه المحامي و وراه علي طول مريم و و هاني و شاب تاني من هيئته و حمله للشنطه انه مساعد للمحامي و في الاخر خالص دخل وراهم اتنين جارد شكلهم مرعب