لقاء كار.ثي

عملتها اول مره بعد خطوبتكم علي طول عشان تبوظ الدنيا بينكم و متخليش فرحتكم تكمل و الوقت رجعت تاني عشان فرحكم قرب عيزاكم تبعدوا يا عشري او حتي تعمل بينكم مشاكل و نكد و شك و توتر

عشري…..هو انا نطقت مع ليله يا فضل انا اه متعصب انها خبت عليا و خوفت عليها لما سمعت التسجيل فكرت لو كانت المجنونه دي عملت فيها حاجه و محدش يعرف كان هيبقي ايه الوضع كنت هخسر ليله انت فاهم

فضل…..فاهم بس ده اللي حصل و خلصنا خلاص هتنكد عليها بقي عشان خبت من خوفها عليك هيفضل الوضع بينكم كده دي عروسه يا اخويا و بعدين مش انا اللي هوصيك عليها يا عشري دي ليله

عشري…..ظهور مريم يا فضل بقي يتعبني اكتر ما بيتعب ليله حاسس انها عامله زي الكابوس بمجرد بس ما بتظهر بحس اني حاطت ايدي علي قلبي احسن ليله ترجع تتجنن و تبعد عني يوم ما وقفتنا علي الطريق مفكرتش لحظه و رفعت عليها السلاح عشان بس اطمن ليله اني بكرهها و اثبتلها انها كدابه و اني مليش ذنب في كل اللي بيحصل ده ذنبي الوحيد اني كنت ناوي اقف مع واحده متستاهلش

فضل…..وليله مش محتاجه منك اثبات يا عشري ليله بتحبك و انت عارف شخصيه ليله اكتر مني مش محتاج اني اتكلم عنها ليله لو مش متأكده من حبك ليها و مصدقه كل اللي حصل ده مكانتش رجعتلك انت متخيل لما ترفع عليها سلاح او تتهور و تعمل مصيبه ليله هتبقي مبسوطه لو ده هيبسطها يا عشري مكنتش منعتك لما رفعت عليها سلاحك و لا كانت خبت عليك انها بتراقبكم ولا خبت عليك انها بتهددها بس ليله اكبر و اعقل من كده بكتير ليله حبتك من قلبها و خايفه تخسرك فا الله يخليك اهدا و بلاش جنان و ركز معاها يا صاحبي طمنها و متحسسهاش انك زعلان و بعدين افرح انت وهي متخلوش مريم تنكد عليكم كل شويه

عشري……بتنهيده ماشي يا فضل ماشي

فضل….بقولك ايه بما اننا بنلف علي الفاضي و انت معندكش مشاوير ولا حاجه ايه رايك نروحلهم نقعد معاهم شويه او اقولك خلينا نجيب اكله حلوه انا ميت من الجوع و ناخد الاكل و نروح نقعد معاهم و اقعد كده اتكلم معاها و راضيها علي القلبه اللي قلبتها امبارح دي وفكك بقي من النكد

عشري…..مش في البيت راحت تتفق مع الميكب ارتيست

فضل…..طب و مروحتش معاها ليه بذمتك ينفع تسيبها لوحدها و هي رايحه تتفق علي يوم فرحها يا عم النكد