لقاء كارثي

ليله…..عارفه يا سلامه من غير ما تقول كل ده

سلامه….و في حاجه كمان انا ريهام صعبانه عليا زي ما هي صعبانه علي امي لان ريهام ملهاش اخوات بنات ملناش قرايب غير من بعيد اوي اوي
ملهاش صحاب بنات فا هي حياتها فعلا مقاصره علينا احنا بس و مشوفتهاش مبسوطه اوي كده غير لما انا و ميدو خطبنا و اتعرفت علي ايه و نادين و عليكم

ليله…..و انا مقدره خوفك ده اوي والله و يمكن انا لما اتكلمت معاك انت و ميدو لما الموضوع اتفتح كنت بجد متعصبه منكم لان ريهام كانت صعبانه عليا بس انا فهمت الوقت اكتر سبب كلامكم و حقك مش هقدر اقول غير كده

عشري…..طيب يا عم سلامه انت ايه رأيك في موضوع شغل ريهام

سلامه…..بابتسامه هي المشكله الوقت مش في شغل ريهام المشكله ان ريهام يا ليله متعرفش الالف من كوز الدره في الشغل عموما ريهام علي الابيض بجد يعني لا في خبره و لا اشتغلت قبل كده ولا عندها خلفيه عن الشغل و انتي بتتكلمي في اداره مكان مستوعبه ده انا طبعاً لازم اكون صريح معاكي لان دي مسؤوليه عارف انك حابه تساعدي ريهام و تخليها تغير روتين حياتها و عارف كمان انك تثقي في ريهام عن اي حد بس لازم تفكري صح لان واضح انك بتختاري الشخص الغلط

عسال…..سلامه يقصد يا ليله ان ريهام ممكن تبوظ الدنيا او لو قولنا هتتعلم فا هتاخد وقت لانها محتاجه حد يفضل معاها فتره عشان تقدر تفهم طبيعة شغلكم و تقدر تمسك مكان انتي كأنك جايبه طفل بتقوليلوا سوق عربيه انت فاهمني يا عشري

عشري…..فاهمك بص لليله ايه يا ليله

ليله…..والله انا عايزه من كلامكم ده كله كلمه واحده يا موافقين يا لا موضوع الشغل ده بقي بتاعي انا

سلامه بص لعسال و ابتسم

سلامه…..ايه رايك يا ميدو

عسال…..الرأي رأيك يا سلامه شوف انت عايز ايه

سلامه…..مش اختك دي انت كمان

عسال…..يا حبيبي تمام بس انت اللي مسؤول عنها و عننا كلنا واكيد انا مش هوافق و انت رافض كلمتك الاهم

سلامه…..وانا عايز رايك

ليله….قول رايك يا ميدو عادي احنا بنتناقش و ريهام تهمك زي ما تهم سلامه

عسال…..اممم طيب انا هقول رأيي و القرار الاخير ليك انا لما كنت برفض او بعترض كان عشان الاسباب اللي سلامه قالها دي كلها ريهام طيبه و علي سجيتها و ملهاش في التعامل و الجو ده فا طبيعي اخاف عليها من الناس و الشغل بس كمان شايف ان اقتراح ليله كويس اوي اولا عشان ريهام تبقي مبسوطه و تخرج من الروتين اللي عايشه فيه و تتعامل مع الناس و في نفس الوقت هي مش هتشتغل في مكان غريب و زي ما ليله قالت ليه لا ادام كلهم و احنا كمان هنبقي جنبها و هنتابعها ده رايي شوف انت بقي