لقاء كارثي

عدي…..لا خالص برد عليكي اللي اعرفوا ان حدوته اقرب حد ليكي و لما سألتك بتقوليلي كان لابس ايه يعني من كلامك ان كل صحابك واخدين عليكي

تقي….لا هو مش كده خالص علي فكره انا بسألك علي اللبس عادي لاني مش فاكره الصوره انا اتصورت معاهم كتير لكن اكيد مش الكل واخد عليا

عدي…..تمام و حتي لو مش الكل واخد عليكي يا تقي عادي ان حدوته ياخد عليكي و يتصور معاكي كده

تقي……هي الصوره هاديه علي فكره يا عدي احنا كلنا واقفين و بنتصور و انت عارف ان حدوته اخويا

عدي…..مش اخوكي يا تقي

تقي…..بابتسامه بسيطه و هي قلبها عمال يدق ماشي زي اخويا

عدي……زي اخوكي في المعامله في المشاعر في الكلام في العلاقه لكن في القرب لا مش اخوكي ولا زي اخوكي و لا ينفع حد يلمسك يا تقي

تقي……هو انت تقصد ايه بيلمسني دي ؟ مش ملاحظ يا عدي انك بتقول كلام ممكن يزعلني منك

عدي……اتفلقي اخبطي دماغك في اتخن حيطه قدامك

اتصدمت تقي و ابتسمت وحطت ايدها علي بوئها كانت عارفه انه غيران بجد و كانت مبسوطه بغيرته دي.

تقي…..ده بجد

عدي……اه بجد زعلانه من كلامي ؟ هو لما بحط ابده علي كتفك كده ميبقاش لامسك يا تقي

تقي……عدي دي صوره عاديه علي فكره

عدي…..يعني ايه صوره عاديه مش فاهم ايه دي اقل صوره ليكم مثلا

تقي…..مقولتش كده بس انت مش مقتنع ان حدوته بالنسبالي اخ بجد و بعدين لو انا شايفه ان الصوره فيها حاجه مكنتش هنزلها و اي حد يشوفها بس كنا بنحتفل و مبسوطين و اتصورنا

عدي…..تقي هو انتي بتستفزيني و لا بتتكلمي جد عشان بس ابقي عارف ارد عليكي و متعصبش

تقي….بابتسامه وهستفزك ليه انا بتكلم جد علي فكره

عدي…..يعني الصوره بالنسبالك عاديه و عادي ان صحابك يكونوا واخدين عليكي و يحطوا ايدهم علي كتفك و يمسكوا ايدك

تقي…..عدي دول صحابي و بعدين محدش فيهم حاطت ايده عليا غير حدوته وده لان علاقتنا بجد قويه و هو بالنسبالي اخويا و بعدين يعني ما انا معاك يا عدي بتعامل عادي

عدي….تاني مقارنه صح طيب بصي يا تقي عشان بس متعصبش و تزعلي مني اقفلي احسن

تقي…..لا مش هقفل و هتسمعني انا مقولتش حاجه غلط و الموضوع مش مقارنه بس يعني افتكر لما خرجنا قبل كده و كنا بنعدي الشارع فضلت ماسك ايدي مشكتش لحظه مثلا انك حد وحش ولما خرجنا مره تانيه و حصل الموقف اللي شوفناه ده و كنت بعيط انت كنت قريب مني وبتهدي فيا يا عدي و تقريبا كنت في حضنك و لما كنا مسافرين و فضلت ماسك ايدي و مش راضي تسيبها خدت الموضوع علي انه هزار بس ده مش معناه اني بجرأ اي حد عليا و لازم تفهم اني لو بتعامل معاك بثقه و انك بقيت قريب مني فا لازم تبقي عارفني و عارف ان حدوته بجد بالنسبالي اخ