لقاء كارثي

رحمه……طيب محمد رد عليا بصراحه هو مقالش انه زعلان مني او من اي حد عندي

عشري….والله حلف انك ما ليكي ذنب و لا اي حد ليه ذنب حتي الويا كان فاكر ان حد فينا مزعلوا و قعدنا قصاد بعض عشان يصدق قال مش زعلان من اي حد و مش عارف هو ماله يعني اللي هو فيه ملهوش سبب غير ضغط مش اكتر و محمود شخص كتوم جداً و بيجي علي نفسه كتير و بيتحمل و في النهايه هو بشر و طاقته خلصت متنسيش كمان ان اغلبنا هيتجوز الفتره دي يعني في ضغط غير ضغط الشغل تعب صدقيني بس انا واثق انه هيرجع احسن من الاول و هيجيلك و يصالحك و يعتذر انتي عارفه هو بيحبك ازاي

رحمه…..تمام يا محمد ان شاء الله يبقي كويس و متقلقش انا مش زعلانه المهم انه يرجع تاني احسن و بجد شكراً انا تعبتك اوي معايا

عشري…مفيش تعب ولا حاجه انتي اختي ربنا يهدي سركم و افرح بيكم قريب

رحمه….اللهم امين

عشري….يلا هسيبك بقي الوقت

رحمه…..ماشي يا محمد مع السلامه

عشري…..سلام.

……………..

سلمي كانت بتلبس في الاوضه و بتلبس هنا اتصل عليها حسان بعدت شويه عن هنا و ردت عليه

سلمي…..يعني هي كويسه؟

حسان….شادي بيقول انها تعبانه بس مش اوي و احتمال كبير تخرج انهارده بس بليل لما يطمنوا عليها البنوته بس اللي في الحضانه تعبانه شويه

سلمي….ان شاء الله يبقوا بخير هما الاتنين و يخرجوا بالسلامه هي مامتها هتسافر امته

حسان…..شادي بيقول طيارتها قبل الفجر يعني اكيد هتسيبهم بليل مش عارف بس هي المفروض مكانتش تسافر

سلمي…..علا بتقولي كانت حاجزه و كانت فاكره ان علا هتولد قبل كده

حسان….ماشي و مولدتش علي الاقل تأجل يومين لحد ما بنتها تخرج و تطمن عليها

سلمي….مش مهم خير ان شاء الله هي بس تخرج بالسلامه و اكيد لو احتاجت اي حاجه احنا معاها خليك انت بس متابعهم عشان حرام شادي مش هيعرف يتعامل لوحدوا

حسان….تمام بس هي والدة شادي معاها و اختها بردوا

سلمي….طيب كويس انها مش لوحدها خالص

حسان…..اه خير ان شاء الله

سلمي…..طيب بقولك ايه انا بلبس انا وهنا و هنروح نطمن علي ايمي و نقعد معاها شويه لو حبيت تيجي تطمن علي هنا ابقي تعالي

حسان….طيب تمام ابقي عرفيني بس لما توصلي و انا هبقي اجي كده اشوفكم عشان ممكن مقدرش اجي اشوفها بليل

سلمي….طيب تمام