لقاء كا.رثي

إنت فاكر إن البعد هيطفي الإحساس جواك بس الحقيقة إن اللي جوانا بيفضل يمشي ورانا حتى لو غيرنا الأماكن والصور والناس.
الهروب مش علاج الهروب تأجيل لوقت انت مش عارفه

إنت مش محتاج تسافر يا تامر إنت محتاج تواجه.

تواجه إنك حبيت غلط وإنك اتوجعت بأيدك مفيش حد بيطلع من حب من غير أثر بس الأثر ده مش لازم يكسرك ممكن يبقى سبب إنك تفهم نفسك أكتر.

المشاعر يا تامر مش بنتهرب منها المشاعر بتتعاش لحد اخرها وبعدين تهدى لوحدها.

الوجع مش حيطه سد ده موج قوي لكن هيعدي من فوقينا

بس اوعي يا تامر تفكر إن السفر مش هيخليه يعدي أسرع بالعكس ده انت هتلاقيه معاك في الشنطة.

اقعد مع نفسك اسمع قلبك من غير ما تهاجمه.

اعرف إنك تستاهل إنك تحب حتى لو الحب كان من طرف واحد بس
اعرف كمان إن كرامتك مش في إنك تهرب كرامتك في إنك تقف على رجلك وتقول لنفسك أنا اتكسرت شويه بس مش هسيب كسرتي تمشيني وتسوقني

لما تفوق و ترجع لنفسك ساعتها لو سافرت هتبقى مسافر عشان تعيش مش عشان تهرب

عارف ايه أكتر حاجة بتوجع يا تامر؟
إنك تفتكر إنك لازم تمشي لأنك مش قادر تشيل الإحساس اللي جواك و واجعك

بس الحقيقة إنك مش محتاج تمشي انت محتاج تفهم

انت حبيت وده مش عيب
المشاعر عمرها ما كانت نقطة ضعف
نقطة الضعف الحقيقية إن الإنسان يخاف منها فيجري ويفتكر إن المسافة هتعالج حاجة جواه.

المكان الجديد مش هيمسح الذكريات والطريق الطويل مش هيقطع الإحساس والغربة مش هتخليك تنسى حد كنت شايف فيه حبك الحقيقي

إنت فاكر إن السفر هيخليك تبدأ صفحة جديدة يا تامر بس عايز اقولك إن الصفحة الجديدة عمرها ما هتتكتب وإنت لسه ماسك القلم بأيد بتترعش أهدأ و اعترف لنفسك إن قلبك اتعلق وإنك اتوجعت وإنك حاولت و انك كمان ظلمته معاك
محدش بينجح في الحب من أول مرة ولا حد عرف يتجاوز حاجة هزته بسهوله

أقسى حاجة إنك تسافر ومشاعرك لسه ساكنة في نفس المكان
ساعتها هتحس إنك مش مسافر يا تامر انت بس بتغير السقف اللي بتنام تحته.

خليك هنا واجه نفسك مش عشانها عشانك إنت.
الحب من طرف واحد مش نهاية ده درس بيحطك قدام حقيقة يمكن عمرك ما شفتها إنك تستاهل حد يحبك بنفس القدر اللي انت مستعد تديه.

الهروب بيخلق وهم اسمه التغيير
بس التغيير الحقيقي عمره ما هيحصل بانك تنقل جسمك من مكان لمكان تاني التغيير بيبدأ لما تبص لنفسك بصدق لأول مرة من غير ما تجمل ولا تهون.