لقاء كا.رثي

ليه يا تامر مش بقولك ليه عشاني لا ليه عشانك انت لان انت متستاهلش ده يمكن غصب عنك و انا مش قادر الومك بس كان قدامك حلول كتير يمكن سمعت ردك عليهم لما سألت قالتلك كان قدامك فرصه تستغلها بعد موت الشخص اللي كان في حياتها انا لو مكانك و قلبي عايزها هجازف يا تامر

بصلوا تامر بهدوء و هو دموعه نازله

سلامه…..اه والله كنت هجازف هخسر ايه يعني حبها ما انا كده كده مش ضامنه كان سهل اروح واقولها اللي جوايا قبلت او طلبت مده تفكر في صالحي رفضت بردوا في صالحي لاني كنت هقفل باب مستحيل أحاول فيه تاني هتقولي كنت خايف عليها ومن خسارتها و خايف ادمر الدنيا هقولك يا اخويا في طرق كتير تخلي اللي قدامك يسمعك و يفهمك و لو محصلش بينكم اللي كنت بتتمناه تقدر كمان و انت بتقفل الباب ده توعدها بأنها هتفضل اختك و ان كلامك ده مش هيأثر علي غلاوتها عندك صدقني كنت هتلاقي طريقه خصوصا انك عارف أيه كويس عارف قلبها عامل ازاي بس المشكله الكبيره يا تامر انك مش بس خوفت تفتح الباب ده انت من خوفك قفلته عليك و رميت المفتاح و عايش تعذب نفسك جوه سجن لا عارف تخرج منه ولا عارف تتقبل وجودك فيه.

من اول ما عرفت أيه و اتعرفت عليكم و خدت خطوه رسميه و انا بشوفك اخ جميل لأيه و ده مش عشان انت ممثل بارع زي ما سلمي قالت لا خالص دي حقيقه يا تامر ولا مره شوفتك لايه غير اخ بجد و هي كمان ديما بتتكلم عنك و عن علاقتها بيك حتي من قبل ما نرتبط و ده معناه ان هي عمرها ما شافت منك غير كل خير و يمكن بعترف ان دي الحاجه الوحيده اللي خلتني ساكت طول الفتره اللي فاتت انا وانت رجاله و بيتهيألي نفهم اوي لو في شاب تقيل علي قبل بنت لو بتخاف منه لو مش بتحب تسمع سيرته و انا عمري ما حسيت ان ده شعور ايه من ناحيتك.

حتي انا يا تامر عمري ما حسيت اني تقيل علي قلبك و لا عمري بصيت في عينك و شوفت فيهم كُره ليا بالعكس شوفت حبك و قربك ليا ما انا بردوا بفهم في اللي جوه الناس لاني مش عيل يا تامر و ابن بلد ده انا حتي عمري ما شوفت في عينك غيره حتي بعد ما بدأت اركز معاك

بس رغم كل ده يا تامر حسيت بيك هتقولي ليه وايه السبب هقولك مش عارف و اقولك علي حاجه تانيه اكبر

انا محستش بيك في المره اللي قالتلك عليها سلمي موضوع الورقه و المحل لا اقولك و افكرك انا حسيت بيك امته يمكن انت مش هتفتكر او تركز بس انا بدايه تركيزي معاك كانت يومها.