لقاء كارثي

نادين….لا يا نعيمه مفيش حاجه انتهت انتي بس عشان لسه في الاول بس والله كل حاجه هترجع مع الوقت

ليله…..لما ابويا مات يا نعيمه علي قد ما كنت مش قريبه منه بس اكتئبت فتره لدرجه ان في اوقات كان بيوحشني خناقي وعندي معاه كان بيوحشني خناقه هو وامي مع بعض

ولما امي ماتت كملت عليا حسيت ان الدنيا اسسودت في وشي وعشان كده قررت اني مقعدش في البلد كلها مش بس البيت و قولت زيك كده خلاص كل حاجه خلصت بموت امي و حقيقي ده كان حاصل وكنت مصدقه احساسي ده اوي بس مع الوقت والشغل و انتوا لقيت الدنيا بتمشي والحياه بترجع اه بيوحشوني و بتوجع لما افتكر اي حاجه تخصهم حلوه او وحشه بس الحياه استمرت يا نعيمه باكل وبشرب بخرج و بضحك بنسهر و بنتجنن حبيت واتجوزت لما بيجوا علي بالي بدعيلهم مش هقولك اني اتعودت علي عدم وجودهم بس خلاص هما مش تعبانين وانا مستنيه يخفوا دول راحوا يا نعيمه وجعهم في قلبي و رحمه امي وابويا ما قل ولا هدي بس اتعودت اعيش بوجعهم و فراقهم و دي رحمه من ربنا علي فكره الحياه بتستمر هتحسيها واقفه فتره وسوده في عينك وملهاش طعم بس كل ما الوقت يعدي الوجع بيصغر مش بيقل يعني بيفضل موجود بس المصيبه بتاعت الفراق اللي انتي شيفاها كبيره اوي مع الوقت بترجع تصغر

نعيمه…..عارفه يا ليله يمكن هبان عاقله علي غير العاده و جايز اطلع مسرح منكم بس موت امي وابويا خلاني احس ان الحجات اللي كنت بشوفها بسيطه و عاديه كانت نعمه كبيره من ربنا و انا مش مقدراها او بلاش اقول مش مقدراها لانها بتعنيلي كتير لكن مكنتش حاسه باهميتها يعني زي ما قولتلكم قعدتنا مع بعض و ضحكنا و احنا مش شايلين للدنيا هم كانت تبان قاعده عاديه بنعملها علي طول بس بجد انا مفتقداها و حساها كانت نعمه كبيره اوي

ليله….بعيدا عن المسرح بس انتي صح و مش بس قعدتنا يا نعيمه احنا في حجات كتير اوي في حياتنا شايفنها عاديه في حجات كتير اوي شايفين انها مش رزق امي كانت ديما بتقولي ان اللي بيتعود علي النعم بينسي يشكر ربنا عليها جايز كنت فاهمه الجمله بس مكنتش حساها اللي هو يعني ايه اشكر ربنا علي نعم معينه ؟

بس مع الوقت الخبره و المواقف اللي الحياه بتحطنا فيها اكتشفت حقيقي ان التعود علي النعم بيولد جوانا غفله يعني كلنا او اغلبنا بنشوف ان الصحه و الرزق و القاعده الحلوه و الحياه المرتاحه و يومك اللي خلص من غير مشكله او من غير مشاكل في الرزق حاجه عاديه
متستحقش الشكر بس لو ركزنا اكتر هنلاقي ان صحتنا دي بالدنيا تستاهل الشكر والحمد طول اليوم