لقاء كارثي

مبدأياً كده انتي عارفه ان لا ليا في جوابات و رسايل و لا شغل المراهقين ده انا راجل افعال يابت مش كلام فا لو طلعتيني مسرح مش هسيبك يابنت المارديني

ليله…..بضحك طلعتك فعلا يا قلبي

اولا يمكن انا مليش في الجو ده بس اول مره احس اني حابب اعملوا لاني مقدر كل الظروف اللي مرينا بيها الفتره اللي فاتت و مجاتش اي فرصه اقولك اللي في قلبي

وحشتيني يا ليله و وحشتي بيتك و وحشتي دنيتي اللي والله العظيم ملهاش طعم من غيرك فاضيه وضلمه و تقبض جابز كنت جنبك بس كنت حاسس لاول مره اني مش قادر اكون سند ليكي و مش قادر اكون دواء لوجعك حاولت والله علي قد ما اقدر اني اكون سند و دواء بس اللي بيحب بجد ديما هيحس انه مقصر في حق اللي بيحبه مهما عمل ..

جايز كنت مش مضايق انك مش في حضني لاني عارف ان ده واجبك تجاه صحابك و هما ليهم حق عليكي

بس كمان كنت مفتقدك بجد و مكنتش قادر اقول ده لاني مكنتش حابب اشيلك فوق طاقتك و تبقي بين نارين انا و الظروف اللي اتحطيتي فيها غصب عنك لحد انهارده الصبح روحي كانت مسروقه مني بس اول ما نعيمه قالت خد مراتك انا مش هرجع البيت روحي رجعت و فرحتي برجوعك يا ليله انهارده فرحه عيل صغير ليله العيد و هو حاضن لبسه الجديد

نزلت دموعها وهي مبتسمه

كان نفسي احتفل برجوعك بطريقه تليق بيكي و تعرفك قد ايه انا من غيرك ولا حاجه كان نفسي احطلك في كل ركن في البيت ورد كان نفسي اعمل حجات كتير بس خوفت تزعلي اني بحتفل و مش فارق معايا الظروف فا ملاقتش غير اني اكتبلك كل اللي في قلبي و تجيبلك حاجه بسيطه البرفيوم بتاعك اللي شميته عليكي لاول مره خبطتي فيها الباب و احنا في دهب رحيتك اللي خدت قلبي و مرجعتهوش هو صحيح كان فاضل شويه صغيره في الازازه بس انا خلصتهم رشيتهم في البيت وفي العربيه و في كل حته مكنتيش معايا فيها عشان احس انك في حضني و طبعا خوفت من لسانك الطويل دورت عليها وجيبتها بحبك يا ليله اكتر من روحي و اكتر من اي حاجه او حد ممكن يخطر في بالك
البلطجي بتاعك….

ابتسمت ليله و حضنت الورقه اوي دموعها نزلت بس كانت دموع فرح و حب و لغبطه الشعور نفسه كانت بتجربه لاول مره مع عشري حست انها عيله صغيره و هو مراهق بس مراهق صادق

خدت نفس عميق ونامت علي السرير و الورقه في حضنها و بعدين مسكت البرفيوم فتحتها و رشت منها في الجو و غمضت عينها فضلت قاعده كده شويه و بعدين قامت و هي عندها طاقه تهد الدنيا