لقاء كارثي
لقاء كارثي
أطمنت ليله علي أيه و فرحت عشانها و ارتاحت لما سمعت صوتها في اخر مكالمه باين انها مبسوطه و كأن حمل كبير من علي قلبها اتشال و فرق كبير بين المكالمتين اللي قبل الاخيره دي لما كانت منهاره و مرعوبه و اخر مكالمه كانت بتضحك ومبسوطه ولا كأن حاجه حصلت.
علي الساعه سبعه ونص راحت علي الاوضه طلعت غيار لعشري تيشرت ابيض و بنطلون چينز و شراب وكوتشي و بعدين خرجت بهدوء راحت علي المطبخ و هي فاصله علي الاخر و خلاص مش قادره هتموت و تنام كل حته في جسمها هتموتها بقالها كام يوم نومها مش كويس خالص وبتصحي بدري و عشري طبعا و الدلع بتاعه بيسهرها في حضنه لحد الصبح
غير تعبها في الفرح من بدري و وقفتهم طول اليوم كانت هتموت وتنام
وقفت طلعت توست و عملتلوا فطار و قهوه و بعدين راحت قربت منه كان نايم علي الكنبه
ليله….عشري حبيبي
عشري….ايه يا حبيبي
ليله….يلا يا حبيبي اصحي الساعه داخله علي ثمانيه قوم ظبط نفسك و البس و جهزتلك الفطار
عشري….بنوم البس فين
ليله….عشري قوم يا حبيبي هتتأخر علي رشيد
فتح عينه عالاخر و بصلها
عشري…..رشيد
ليله….اه يا حبيبي مش هتروح معاه يلا قوم
عشري……الساعه كام
ليله….خلاص داخله علي ثمانيه والله
عشري……انتي لسه منمتيش؟
ليله….لا يا حبيبي مرضتش انام خوفت تروح عليا نومه وانا تعبانه ولو حطيت راسي مش هقوم
عشري….قام عدل نفسه وباس راسها بحب حقك عليا سهرتك
ليله….لا يا عمري انا كده كده مكنتش هعرف انام غير لما اطمن علي أيه
عشري…..طيب كلمتك
ليله….بابتسامه اه اطمنت عليها هي وسلمي خلاص كله تمام
ابتسم عشري و لعب في شعرها
عشري…..طيب الحمد لله مبروك يا بلطجيه
ليله….بضحكه جميله الله يبارك فيك يلا قوم بقي
عشري…طيب يلا تعالي انتي نامي و انا هلبس وانزل
ليله…..لا هفضل معاك لحد ما تخلص و افطر الاول الفطار جاهز
دخلت معاه علي الاوضه جوه
دخل علي التويلت شويه وطلع و هو بينشف وشه مكانش قادر ملحقش ينام و تعبان جدا لمحها ماسكه التيشرت بتاعه في ايدها و سانده راسها علي ضهر السرير و مغمضه
عشري….حبيبي
ليله….فتحت بسرعه عينها كانت حمرا خالص
عشري…. انتي نمتي وانتي قاعده يا ليله
ليله….فصلت عالاخر
عشري….طيب هاتي كده انا هروح البس بره و يلا يا ماما نامي انتي
