لقاء كـ،ـ،ـارثي
الدكتور ….طيب وايه اكتر حاجه متغيره بالنسبالك في السفريه دي
نعيمه…..لا كتير يعني انا كل مره باجي فيها دبي ببقي حاسه بنفس السعاده والانبهار و كل مره بكتشف حاجه جديده بس المرادي انا يمكن منزلتش غير مرتين عشان اشتري حاجه و اي حاجه كانت بتبهرني لما باجي حساها عاديه و حاسه ان انا معنديش روح منزلتش اتمشيت حتي يادوب السوبر ماركت وبرجع
حاسه اني لوحدي خالص اه البلد زحمه وفيها ناس واجواء بس كل حاجه ساكته يمكن ده جوايا بس الحقيقه اني حاسه ان الموضوع مختلف عن اي مره
الدكتور….طيب لو سالتك في العادي ايه اكتر حاجه بتعجبك في الامارات عموما
نعيمه….بابتسامه ان الناس في حالها اوي مش مركزين مع حد شغل وبس لا حد بيتدخل في حياة حد ولا حد بيركز في تفاصيل حياتك هدوء نظام تحس انك وانت ماشي بتبقي ماشي لوحدك لا حد بيبص عليك و لا بيشاور و لا مستني عليك غلطه
كملت بضحكه هاديه بس علي فكره يمكن الحجات دي بتعجبني بس انا مش هاديه يعني قولتلك مش بحب الوحده و لا بحب اني اكون في حالي اوي كده جايز بيعجبني ان الناس ذوق محترمه في حالهم بس دي مش شخصيتي يعني بصراحه فيا جزء متطفل شويه فضولي مقدرش معرفش حاجه عن صحابي و بسأل و بركز معاهم
الدكتور…..بابتسامه جميل اوي انك تعترفي بده
نعيمه…. عشان دي حقيقه انا مش بسيبهم في حالهم و نفسي اوصل لمرحله الناس هنا اني ابقي في حالي لان اوقات بحس ان ده بيعمل مشكله
الدكتور….طيب صحابك بيعملوا زيك
نعيمه…..ممكن بس كل واحده فينا ليها طباع جايز انا اصعب طباع فيهم هما ممكن يسألوا او يستفسروا بدافع الاهتمام او الاطمئنان
الدكتور…..يعني انتي سؤالك ليهم مش بدافع الاهتمام او الاطمئنان شايفه انه فضول و تطفل اكتر
نعيمه…..مش بالمعني الحرفي انا اكيد الاكتر جوايا ببقي مهتمه و عايزه اطمن عليهم بس ببقي حابه اعرف تفاصيل التفاصيل بيبقي عندي فضول قوي افهم كل حاجه بحس اني متطفله بس والله انا اوقات بحس اني بحب صحابي بطريقه غير اللي بيحبوني بيها
الدكتور…..اشرحي اكتر يعني ايه
نعيمه……انا بحهم اوي اوي عارف لما تحس بالامان و الراحه و الهدوء و السكينه و الإطمئنان مع اشخاص لدرجه انك تدي لنفسك الحق في التطفل علي حياتهم و تبقي حاسس انهم بتوعك انت مش من حق حد يزعلهم يضايقهم مش من حق حد يدخل وسطكم ياخدهم منك بغير عليهم بحس كده عارف الدبه اللي قتلت صاحبها
