لقاء كـ،ـ،ـارثي
الإنسان بيتحاسب على أفعاله مش على اللي قلبه حس بيه غصب عنه.
انتي محاولتيش تقربي من عشري
ما كسرتيش ثقة صاحبتك
بل بالعكس خفتي لدرجة إنك بعدتي وحطيتي حدود لنفسك
وده مش تصرف إنسانة ضعيفة
ده تصرف إنسانة ضميرها صاحي زيادة عن اللزوم.
اللي حاصل دلوقتي إنك بتمري بحالة اسمها تضارب مشاعر.
عقلك بيقولك أنا لازم أكون واضحة وما أغلطش
وقلبك بيحاول يفهم أنا حسيت بده ليه؟
ومع الضغط ده كله طبيعي تتلخبطي و تتصرفي غلط و تبقي عنيفه وهجوميه و تخسري ناس
بس خليني أسألك بصراحة يا نعيمه
لما بتفكري في عشري هل بتتمني يكون ليكي؟ ولا مجرد ذكرى او إحساس أول اتقفل قبل ما يعيش؟
لأن أحياناً يا نعيمه القلب ما بيبقاش متعلق بالشخص القلب بيبقى متعلق بإحساس البدايات اللي حصلت مرة و مكملتش.
نعيمه….انا في وسط كل اللي حكيته ده عمري في مره ما جه عشري علي بالي بالطريقه دي ديما يجي بصورته الاولي اللي شوفته فيها اول مره ديما يجي في موقف عجبني منه
عمري مثلا ما شوفت نفسي او اتمنيت اني امسك ايده اتكلم معاه كلام رومانسي عمري ما شوفت اني مراته عمري ما شوفت عشري بصوره بسن راجل وست ديما في بالي اول مره شوفته و اي موقف بيعجبني بس انا شوفت نفسي في حياة فضل باكتر من طريقه شوفت نفسي في حضنه في بيته شوفت نفسي مراته حبيبته شوفت نفسي ام ولاده بس
بس من كتر الضغط انا حتي عمري ما عبرت لفضل عن كل مشاعري دي تجاهه
الدكتور….هز راسه بهدوء الكلام اللي قولتيه دلوقتي مهم جداً ويمكن هو أكتر جزء صادق في الحكاية كلها.
انتي بنفسك قلتي إن عشري عمره ما جه في خيالك كراجل ليكي
لا شفتي نفسك مراته ولا حبيبته ولا حتى بينكم قرب حقيقي.
هو دايما بييجي في بالك كصورة أولى اول انطباع أول موقف عجبك منه
ودي حاجة العقل بيحتفظ بيها أحياناً زي لقطة ثابتة ذكرى مش علاقة وفي بينهم فرق كبير
لكن لما اتكلمتي عن فضل الصورة اختلفت تماماً اتخيلتي بيت حضن حياة أطفال يعني مستقبل كامل.
وده فرق كبير جدا يا نعيمه.
الإعجاب غالبا بيقف عند اللحظة
لكن الحب الحقيقي بيمشي معانا و يكمل اللي حصل إنك خوفتي من مجرد وجود الصورة القديمة دي في دماغك فكبرتيها في قلبك لحد ما بقت شبه تهمة بتحاكمي نفسك بيها
لكن من كلامك أنا شايف إن قلبك كان واضح انتي كنتي شايفة حياتك مع فضل مش مع عشري.
اللي واجعك دلوقتي مش عشري
اللي واجعك إنك ما قلتيش لفضل كل اللي جواكي ناحيته حسيتي إنك ظلمتيه ويمكن ظلمتي نفسك كمان.
بس خليني أقولك حاجة مهمة:
الإنسان أحيانا بيكون صادق في مشاعره لكن الخوف بيكتم صوته.
وانتي ما كنتيش بتهربي من الحب يا نعيمه انتي كنتي بتحاولي تحمي كل الناس اللي حواليكي بس خليني اسالك كام سؤال و اتمني تعتبري نفسك بتتكلمي مع نفسك بكل وضوح.
