لقاء كـ،ـ،ـارثي
الدكتور…..ايه اكتر حاجه لفتت نظرك ليه سواء في الشكل او الشخصيه؟
نعيمه….مش الشكل خالص بس الشخصيه و يمكن اول حاجه لفتت نظري ليه اني حسيته شخصيته قويه رغم مش هو الكبير رشيد وحسان اكبر منه ويمكن انا اول واحده فيهم اعجبت بحد من الشباب من اول ساعتين لما صمم يمشي كان رافض يقعد مع بنات لوحدهم وفي الظروف دي و كان عايزينا نبقي براحتنا مطمنين لان طبيعي وجود ست رجاله معانا تقلق مشي كلامه علي الكل و مهتمش بالجو و لا انه ممكن يعرض حياته وحياتهم للخطر مهتمش بكلام ليله ولا اقناع ايمي ليه و فضل مصمم في اللحظه دي لفت انتباهي كلامه طريقته مع اني من قبلها بساعه كنت رافضه وجودهم خالص بس شخصيته القويه عجبتني انا بيلفت نظري اي شخص قوي قيادي لان انا شخصيتي و طباعي صعبه و الطبيعي ان الست بتحب الراجل يكون اقوي
من اللحظه دي اتشديت ليه و حسيت اني محتاجه راجل زي ده في حياتي لما كملنا يومين بنتعرف علي بعض معرفتش اقول للبنات اني اعجبت بحد كنت شايفه اني مينفعش اقول ده في الظروف اللي احنا فيها البلد خربانه و احنا محبوسين مع رجاله ودهب فاضيه علينا كنت خايفه يقولوا بالسرعه دي طب ازاي و امته كنت خايفه يقولولي انتي في ايه ولا في ايه بس استنيت قولت اكيد هقولهم بس علي الاقل اتاكد اكتر لحد ما ايمي اتكلمت معانا و قالت فكرتها المجنونه وقتها حسيت ان الفرصه جاتلي و كنت هقول بس ليله سبقتني و انا بسرعه رجعت لوراء ألف خطوه
الدكتور…..حسيتي بأيه وقتها ؟ اضايقتي؟
نعيمه…..اتصدمت بس مضايقتش اصل انا محبتهوش انا كل اللي فكراه وقتها اني اتعاملت عادي جداً و يمكن حسيت احساس غريب جوايا عارف لما كل حاجه تسكت مره واحده انا كنت حاسه بكده كل حاجه سكتت جوايا وحواليا معرفش اضايقت ولا لا بس كنت ساكته مش ساكته كلام ساكته تعبير ساكته من جوايا بحاول ابان طبيعيه و متاخدتش بس اااه جايز اكون أضايقت مش منها من الموقف
الدكتور…..طيب وليه اختارتي فضل عشان ابن خالو يعني كنتي بتحاولي تبقي قريبه من عشري
نعيمه….لا خالص انا قولت عادي اجرب ماهو انا محبتش عشري انا اعجبت بشخصيته ليه لا ليه مجربش مش جايز طباعهم وعاداتهم تكون واحده و يبقي نفس الشخصيه و نفس المميزات اللي بتمناها في الراجل و مش هنكر اني كنت مبسوطه مع فضل و بعدين مستحيل اقرب من فضل عشان هو قريب عشري
