لقاء كـ،ـ،ـارثي
الدكتور …بصي يا نعيمه أول حاجه لازم تعرفيها إن اللي انتي حاسه بيه ده مش دليل إنك إنسانه وحشه بالعكس خوفك ده أكبر دليل إن عندك ضمير صاحي
انتي ماخونتيش حد لا بفعل ولا حتى بنية مقصوده اللي حصل إنك دخلتي صراع بين قلبك وعقلك و قررتي تمشي ورا عقلك عشان تحمي كل اللي حواليكي وده قرار صعب مش أي حد يقدر ياخده غير القوي و انتي قويه..
خليني أقولك حاجه مهمه
التفكير في شخص أو إن ذكرى حد لسه جواكي مش معناه إنك عايزه ترجعي له ولا إنك هتغلطي و لا حتب انك بتحبيه ده معناه بس إن فيه مشاعر قديمه ماخدتش فرصتها تكمل أو تنتهي بشكل طبيعي.
انتي ما بعدتيش عن فضل عشان ما بتحبيهوش انتي بعدتي عشان خوفك من الغلط كان أكبر من رغبتك فيه والسؤال اللي بيدور في دماغك أنا ليه لسه بفكر في عشري؟
ده سؤال طبيعي جداً لأن العقل بيحب يقفل القصص اللي ما خلصتش لأن أوقات كتير يا نعيمه
إحنا ما بنحبش الشخص نفسه
إحنا بنفضل متعلقين بالقصة اللي ما اتعاشتش للنهاية
بس خليكي فاهمه حاجه
الإنسان مش بيتحاسب على الفكرة اللي بتعدي في دماغه
الإنسان بيتحاسب على القرار اللي بياخده
وانتي قرارك كان واضح بعدتي
حميتي أختك وصحابك ونفسك وفضل فا بدل ما تحاسبي نفسك اسألي نفسك سؤال تاني أهم
هل انتي حزينة على فضل؟
ولا حزينة على الاحتمال اللي ما حصلش بخصوص عشري؟
نعيمه…بالعكس انا جملة فضل تعباني اوي حسيت اني سمعاه حسيت و هو كاتبلي عمري ما هسامحك طالعه من قلبه حسيت انه موجوع اوي
الدكتور…..رديتي عليه؟
نعيمه…..لا مردتش
الدكتور…..طب لو حابه مثلا تردي ايه الحاجه اللي تحبيه تقوليها
نعيمه…..معرفش لان حتي لو طلبت السماح مش من حقي بس يمكن كنت اتمني اكون جنبه في الوقت ده و احضنوا اوي
الدكتور…..بصي يانعيمه خلينا نفصل بين حاجتين مهمين:
الإعجاب الأول و الحب الحقيقي.
عشري كان أول حد لفت نظرك أول إحساس جديد دخل قلبك وده طبيعي جداً يسيب أثر المشاعر الأولى غالباً بتفضل محفورة في الذاكرة حتى لو ما كانتش حب كامل.
لكن فضل ده الشخص اللي قلبك ارتاح معاه فعلًا اللي مشاعرك معاه كانت أوضح وأهدى.
المشكلة مش إنك وحشة المشكلة إنك حطيتي نفسك في محاكمة قاسية.
بقيتي بتعاقبي نفسك على مجرد فكرة عدت في دماغك
خليني أقولك حاجة يا نعيمه
المشاعر اللي الإنسان ما اخترهاش مش خطيئة.
