لقاء كـ،ـ،ـارثي
الدكتور…..ليه مقولتلهاش يا ايمي ؟
نعيمه…..اقولها ايه مينفعششش
الدكتور……ليه مينفعش انتوا صحاب و اللي بينكم كبير وايا كان اللي كنتي هتقوليه مستحيل كانت تقول لليله بس كنتي هترتاحي
نعيمه…..بالعكس انا مكنتش هرتاح فكره اني اتكلم في حاجه زي دي اصلا مرفوضه مقدرش اظهر في عين ايمي خاينه او واحده وحشه حتي لو انا متأكده انها مش هتقول لليله مقدرش اخوفها مني علي جوزها مقدرش اتحمل نظرتها وهي عينها عليا طول الوقت مع عشري او غيره مقدرش اخلي علاقتنا فيها توتر انا من البدايه مستحيل اخسر حد منهم عشان راجل بس ان ايمي تعرف مشاعري كان هيخلي علاقتي بيها طول الوقت متبقاش مريحه كان لازم انكر كل ده عشان احافظ عليها هي شخصياً
الدكتور….مش يمكن كانت فهمتك و عرفت ان انتي في الاول اعجبتي بيه خصوصا انك اخترتي اكتر شخصين لفتوا انتباهك عشري و فضل
نعيمه…..ايمي بتحب ليله اوي و مهما كان حبها ليها هتاخد مني موقف حتي لو فهمت مشاعري حتي لو عرفت اني اختارت عشري قبل ليله حتي لو كان من جواها عارفه ان مشاعري دي غضب عني مكانش ينفع ابداً اهز صورتي في عينها
هي بنفسها اتصدمت من رد فعلي و الحقيقه ان رد فعلي وقتها لما بفكر فيه صدقني والله العظيم مكانش تمثيل انا كنت صادقه في كل كلمه انهياري و رفضي للي هي بتقولوا كان حقيقي مكنتش بمثل عليها كل كلمه كانت طالعه من قلبي يمكن عشان انا من جوايا رافضه اللي انا فيه و يمكن كمان عشان لما واجهتني باللي انا مش عارفه اواجه بيه نفسي حسيت اني واقفه لاول مره بتخانق مع نفسي اللي كانت واقفه قدام ايمي بتنكر و منهاره هي دي انا هي دي نعيمه اللي لايمكن تخون او تبص لراجل في حياة صاحبتها واختها ويمكن ايمي اتصدمت من نفسها و دي مش شخصيه ايمي هي لما بتبقي واثقه في احساسها لايمكن تصدق او تتعاطف مع حد بس هي ندمت لانها فعلا مشافتش مني اي حاجه غلط
انا طول الوقت كنت عارفه حدودي و مشاعري دي كانت جوايا انا بس
الدكتور…..زعلتي منها يا نعيمه
نعيمه….بدموع لا زعلت من نفسي و يمكن كنت محتجاها اوي محتاجه اترمي في حضنها واحكيلها علي كل حاجه كان نفسي اقولها فوقيني يا ايمي كان نفسي اقولها اني معملتش ده بمزاجي و انه كان غصب عني و اني بس عشان عرفت ان ليله معجبه بيه بتدت فوراً كان نفسي اتكلم اوب وقتها لان طول الفتره دي من وقت ما عرفنا الشباب كنت عماله اخبي واضغط علي نفسي واكتم جوايا و اتجاهل مشاعري و ادخل في مشاعر تانيه خالص و حوارات كتير انا فجأه بقيت حاسه ان كل حاجه وجعتني حتي لو بسيطه رجعت تضغط عليا تاني
