لقاء كارثي

سلمي…الصبح حر شويه لكن بليل برد وبعدين احنا هننزل علي سته
يعني الجو هيبقي حلو

ايه…..انتي ناسيه اننا هنفضل نقلع و نلبس و نقيس في الفساتين يعني اكيد هنفرهد

سلمي….امممممم طب ايه البس صيفي يعني

ايه….اه مش مستاهله شتوي يعني خدي اي سويت شيرت لو بردتي البسيه بس بجد الجو حر خالص

سلمي…..طيب ماشي

ايه….بقولك ايه

سلمي….قولي

ايه….انا في حاجه كده عماله افكر فيها من الصبح و عايزه اعملها اوي بس مش عارفه اعملها ازاي

سلمي….حاجه ايه خير

ايه…..الاول هي ليله اكيد مش هتعمل حنه صح

سلمي….اه قالت لا كويس انها وافقت علي الفرح اصلا معرفش ايه اللي قافلها من حوار الفرح ده مع اني تخيلت ان ليله بالذات هيفرق معاها موضوع الفرح و الفستان دي احتفلت ورقص في كل مناسبتنا وكانت متحمسه اكتر ماهي متحمسه لنفسها

ايه…..بصراحه وانا برضو هي ليه مققوله كده من الفرح

سلمي…..مش مقفوله هي بس مكانتش عايزه فرح كبير كانت عابزه فرح بسيط مقتصر علينا و علي اهلنا بس هي طبعا مقدره ان عيله عشري كبيره فا عشان كده سكتت المهم بتسألي ليه علي الحنه

ايه….بصراحه يعني حابه اني افرحها وبفكر كده اني افاجئها شوفت فرقه بتاعت بنوته نوبيه بتعمل شو يجنن من الصبح بتفرج عليه هي قاعده هنا في القاهره و بصراحه ليله تعبت اوي الفتره اللي فاتت بفكر اني افرحها و نجيبها البيت عندها مش هنعمل حنه كبيره اوي يعني بس علي الاقل نبقي بنات كلما وهي تتبسط

سلمي…..والله فكره طيب هي في ارقام تليفون ليها

ايه….ايوه في بيدچ هي عملاها و حاطه ارقام تليفون وكل حاجه بس هنعمل ده امته و هننزل ليله من البيت ازاي عشان نجهزه فهماني

سلمي….امممم بيتهيألي اكتر حد ممكن يساعدنا في ده هو عشري نقولوا و نخليه ياخدها بأي حجه من البيت و احنا نتفق كلنا مع بعض و نشوف مين اللي هيجي و يجيبها لما نقوله و ممكن نعمل ده قبل الفرح بيومين عشان ترتاح ميبقاش تعب عليها بس المشكله انها مش هتبقي عامله حسابها للبس

ايه….يا بنتي هما بيلبسوها حجات جميله يعني تيجي و تتفاجئ و مش مهم تبقي تدخل تغير و بعدين مش هنطول اكيد يعني عشان ترتاح نبسطها شويه وخلاص

سلمي…..طيب تمام اتفقي مع الست هو فاضل ست ايام يعني قبل الفرح بيومين كويس

ايه…..طيب هيبقي عندها حاجه اليوم ده