لقاء كارثي

قلبها بيدق كل شويه تاخد نفس عميق كأنها مش مصدقة

ليلـه….بابتسامة هادية بصت لايمي أنا حاسة إني في حلم يا ايمي

ايمي…بابتسامه لا يا قلب ايمي ده مش حلم حضنتها من ضهرها و هي بتضحك بهدوء انتي في ماراثون فساتين

ليله…..بضحكه جميله حلوين اوي

ايمي…..وعليكي هيبقوا احلي

الوقت كان عمال يعدي البنات رايحين جايين المكان كبير اوي ثلاث ادوار و كل دور مساحته واسعه و كبيره و الفساتين اللي في الدور الواحد محتاجه وقت طويل عشان يختاروا منها..

بقي كل اللي يعجبوا فستان يدخل يقيس و يرجع يقيس غيره ليله كانت واقفه محتاره الفساتين تجنن بس في منهم اللي كان يعجب البنات و ميعجبهاش و في منهم اللي يعجبها وذوقها اوي بس عريان جداً
وكان في اللي مليان استراس و في اللي اوڤر اوي و زحمه رغم فخامته والاهم انها كانت عامله حسابها انها متزعلش عشري مع انها كانت واثقه ان المرادي بالذات كان هيعدي و مش هيضايقها بس كانت حابه اليوم يكون جميل و مميز و هادي مفيش حد فيهم مضايق..

اما الشباب فا هما كمان اتفقوا و نزلوا مع بعض كلهم و الي خلي الجو احلي و جود اخوات عشري علي وعمر و سليمان و علي راسهم محمود و كان نفس الوضع عندهم تاييهين في بحر كبير من البدل الجو العام بينهم كان كله ضحك و هزار وسعاده بس وضعهم كان اهون شويه من البنات.

بقوا كل شويه يبعتوا صورهم لبعض علي الشات اللي بينهم و ڤديوهات صغيره كلها ضحك من الشباب وايه و ايمي يبعتوا صور البنات وهما محتاسين و رايحين جايين بفساتين و اللي قالع منهم الكوتش و ماشي حافي خدوا لبعض كميه صور ذكري متتنسيش..

ليله كانت مبسوطه هي و عشري اوي عشان كانوا حاسين انهم مع بعض و كل واحد فيهم متابع التاني

………….

الوقت كان عمال بيمر و من كتر ما الفساتين كانت تجنن الاختيار كان صعب البنات اللي شغالين في المحل معاهم و وصل صاحب المكان و كان مصمم معروف و يعرفهم كويس بقي يحاول يساعدهم ..

بعد اكتر من ثلاث ساعات من التعب اللي كان جاب عليهم يبصوا لبعض و يضحكوا مناظرهم كانت تفطس من الضحك بجد قالعين الكوتشات شعرهم مش مظبوط من القلع و اللبس و فرهدوا خالص

ريهام…..بتعب احنا قسنا كام واحد لحد دلوقتي؟

ايه…..بضحك ما تسأليش أنا فقدت العد بعد ١٢

امنيه….انا متعبتش في اختيار فستان فرحي كده