لقاء كارثي

قمر…..منها لله عيشتني يوم في عمري كله مش هنساه كان عاين عليا اموت و لا اني اعيش الاحساس ده

ليله….بعد الشر عليكي قولتلك عمر هيرجع و خلاص بقي فكنا من السيره السوده اللي تعبت اعصابي دي

اميمه…..الحمد لله علي كل حال

ليله….سامح كويس

قمر……اه الحمد لله بس كان تعبان علي الفجر اوي ضغطه كان عالي و صحيت و احمد و اميمه كمان صحيوا و فضلوا قاعدين معانا احد ما اتحسن نام شويه كمان و بعدين نزل علي الشغل

ليله…طيب طمنيني حصل بينكم اي مشكله

قمر…..لا هو كان ساكت كنت حاسه انه زعلان مني في الاول لما جالي بس انا مليش ذنب لما شاف بنفسه اللي حصل متكلمش

ليله….معلش هو بس اتخض و الموقف يعني مكانش عادي

اميمه….اكيد طبعا ده ابنه

ليله….طيب عمر عامل ايه هو فين

قمر…في البلكونه

اميمه….زعلان عشان قمر مخصماه

ليله….ليه عمل ايه ؟

قمر….لسه بتسألي يا ليله يعني بعد ما راح مع الراجل و وقف قلبي شايفه انه معملش حاجه من امته وهو بيروح مع حد غريب

ليله…..انتي عبيطه يا قمر عمر صغير و حتي لو غلط مش وقت خالص انك تقلبي عليه كفايه الموقف اللي عاشه ده صوت صرخته وهو بيعيط اول ما شافنا مش راضيه تروح من ودني

قمر…..ولا انا يا ليله بس مينفعش اعدي الموقف من غير عقاب و ده ابسط عقاب اني متكلمش معاه ليله انتي مقدره الموقف اللي كنا فيه امبارح و عيشتيه معانا

ليله…اه يا قمر مقدره و عارفه انه غلط بس كمان عمر عنده ثمان سنين لسه صغير ممكن تعملي كده بس بعد ما تطمنيه شويه ابنك كان مرعوب و هو في حضني ضربات قلبه كانت هتطلع من صدره

قمر……و انا مين يطمني يا ليله انا لحد الوقت مش قادره اتلم علي اعصابي اللي هيجنني انه مش غبي عمر كلنا بنقول عليه سابق سنه و ناصح ازاي يعمل حاجه زي دي

اميمه….اختك معاها حق الواد صغير حتي لو ناصح الراجل ضحك عليه و بعدين المهم انه رجع احضننا و الله يا ليله عمر مقطع قلبي كل شويه اروح البلكونه عشان ادخلوا مش راضي و قاعد يبص علي الشارع و زعلان

ليله….بصت لقمر وقامت وقفت بتهرجي والله

راحت بهدوء علي البلكونه كان واقف باصص من الحديد و ماسك بايده دخلت علي و حضنتوا من ضهره

ليله…..قلب ليله اللي مجاش يسلم انت مش سامع اني جيت ولا ايه فين الحضن بتاعي

عمر…..بصلها كنت عارف انك هتجيلي